E fundit!

11:03 Aktualitet

Greva në Greqi, pezullohet përkohësisht lëvizja në Kapshticë dhe Qafë Botë

Për shkak të grevës së punonjësve të doganës greke, pika d...

Ndarja nga jeta e akademikut Rexhep Qosja/ Kurti: Vepra e tij nis sot një jetë të re

23 Prill 2026, 20:14, Kosova & Bota CNA

Ndarja nga jeta e akademikut Rexhep Qosja/ Kurti: Vepra e tij nis sot një

Kryeministri i Kosovës, Albin Kurti ka reaguar pas ndarjes nga jeta të akademikut, Rexhep Qosja. Në postimin e tij në rrjetet sociale, Kurti shkruan se vepra e tij do të jetojë për shumë gjatë dhe se sot nis një jetë pa autorin e saj.

Ndër të tjera shprehet Rexhep Qosja ishte gjuhëtar, shkrimtar, politikan e dijetar. Kurti thekson se populli shqiptar nuk ka një akademik tjetër bashkëkohor i cili kontribuoi kaq shumë për gjuhën dhe kombin.

Reagimi i plotë:

Ngushëllimi na vjen prej jetës së tillë

Rexhep Qosja ndërroi jetë sot. Vepra e tij padyshim që do të jetojë shumë më gjatë se shekulli i tij. Mirëpo, fillimisht, vepra e tij nis një jetë të re sot: jetën pa autorin.

Dhjetëra libra të Rexhep Qosjes tash fitojnë një tjetër lloj leximi dhe sigurisht edhe lexues të rinj. Nga studimet gjuhësore dhe kritika letrare te ditarët historikë, nga tregimet e dramat te romanet voluminoze, tani do të mund të ripërjetohen ndryshe.

Dhe nga ai rilexim i yni dhe i gjeneratave në vijim do të varen mësimet e inspirimet e së ardhmes. Është fat i madh për një komb të ketë regjistrues të këtillë të kohëve të veta, të mendimit dhe të situatave.

Natyrisht që askush nuk do të mund të thotë që ky apo ai shkrimtar a veprimtar ishte rilindasi ynë i fundit. Por sigurisht që të gjithë duhet ta themi që askush nuk i ka njohur dhe ditur më thellë si dhe çmuar e afirmuar më lart rilindasit tanë sa akademik Rexhep Qosja.

Në akademi ishte gjuhëtar e në gjuhë ishte historian, në publik ishte shkrimtar e në shkrim ishte mendimtar, në shoqëri ishte politikan e në politikë dijetar. Midis trashëgimisë së iluminizmit evropian dhe jetëshkrimit të Gjergj Kastriotit Skënderbeut, sikurse edhe midis romantizmit dhe postmodernes, qarkullonte mahnitshëm dhe frymëzonte parreshtur.

Shkruante edhe për shkak se kishte lexuar shumë. Shkruante shumë sidomos për shkak se kishte çfarë të thoshte. Jetën e kaloi midis librave, jo pak prej të cilëve e kanë për autorë vetë atë, në bibliotekën e secilit prej nesh.

Populli shqiptar nuk ka një akademik tjetër bashkëkohor i cili kaq shumë kontribuoi për gjuhën dhe kombin tonë e njëkohësisht aq shumë u sulmua nga politika dhe kolegët e tij. Do të mbahet mend siç ishte dhe ishte siç mbeti - i paepur.

Dy muaj pa i mbushur nëntë dekada që ia kanë vlejtur fort për shqiptarët mbarë. U nda nga jeta, por i rron gjallë vepra. /CNA