Pezullimi i vizave/ Klodian Tomorri: Trump ka marrë listën e vendeve që kanë ngarkesë me skemat sociale

2026-01-15 20:40:00, Aktualitet CNA

Pezullimi i vizave/ Klodian Tomorri: Trump ka marrë listën e vendeve

Gazetari Klodian Tomorri ka komentuar vendimin e SHBA për pezullimin e vizave për Shqipërinë. I ftuar në Task Forcë, Tomorri deklaroi se vendimi i Trump ka fokusuar vëmendjen tek kombësitë që sipas tij përdorin ndihmën sociale në masë.

Vendimi amerikan, shpjegon Tomorri, lidhet me faktin që Shqipëria konsiderohet një vend i varfër, me shërbime publike të kufizuara, spitale dhe shkolla të mangëta, si dhe një sistem drejtësie të perceptuar si joefikas. Këto faktorë, sipas tij, janë pjesë e arsyeve pse qytetarët shqiptarë zgjedhin të emigrojnë dhe të mbështeten në ndihmën sociale jashtë vendit.

“Unë nuk habitem fare sepse aty ka ndodhur një gjë e thjeshtë. Presidenti i Shteteve të Bashkuara ka marrë listën e kombësive që ka më shumë ngarkesë te skemat sociale. Dhe ka thënë, kush janë kinezët. 70% e kinezëve që kam në Amerikë janë në skemë sociale, duan para, i mbaj unë nga qeveria. Shqiptarët...tani të themi ne pse shqiptarët në Amerikë jetojnë me ndihmë sociale... Unë nuk e di, ndoshta shqiptarët nuk janë të zotët.

Janë dy gjëra, numri absolut i shqiptarëve që emigrojnë jashtë është një çështje tjetër, dhe numri relativ i shqiptarëve që janë në Amerikë, të cilët shkojnë marrin ndihmë sociale, është një tjetër gjë.

Vendimi i SHBA-së është ky. Je një vend i varfër. Je një vend ku nuk ke shërbime publike, nuk ke spitale, nuk ke shkolla. Je një vend ku nuk ke drejtësi. Je një vend ku qytetari e percepton çdo ditë që përballet me padrejtësinë kur shkon në dyert e institucioneve të shtetit, e të tjerë e të tjerë. Pra, këto janë faktorët që i çojnë shqiptarët të marrin trastat në kurriz edhe të ikin në një vend tjetër”, tha Tomorri./ CNA