Drutë e zjarrit, problem për Pustecin/ Kryebashkiaku dhe Zonat e Mbrojtura pranojnë ngërçin

16 Nëntor 2023, 22:37, Denoncim CNA

Drutë e zjarrit, problem për Pustecin/ Kryebashkiaku dhe Zonat e

Mungesa e druve të zjarrit mbetet një nga problematikat më të mëdha të banorëve të bashkisë Pustec. Paraditen e sotme ata kanë protestuar pranë zyrave të pushtetit lokal për shkak se nuk lejohen nga administrata e zonave të mbrojtura për të prerë dru në sipërfaqet pyjore që i përkasin parkut kombëtar të Prespës.

Në intervistën për mediat, kryetari i bashkisë Pustec Pali Kolefski ka pranuar se kjo problematikë është aktuale, ndërsa shton se mes bashkisë dhe administratës së zonave të mbrojtura nuk është arritur marrëveshja, pasi ka ngërç në një prej pikave të saj, konkretisht magazinimin e sasive të druve të zjarrit.

“Shqetësimi i qytetarëve është shumë real. Ne e kemi bërë një marrëveshje me Zonat e Mbrojtura, por kërkojmë që një pikë e marrëveshjes duhet të përmirësohet, që të hiqet përshembul ai termi “magazinim i druve të zjarrit” sepse koha nuk premton e para dhe e dyta me kushtet atmosferike që janë tani është pothuajse e pamundur realizimi i këtij procesi në këtë mënyrë. Ne kemi propozuar që ajo lëndë që sigurohet nëpërmjet punimeve përmirësuese të shpërndahet brenda ditës”, tha Pali Kolefski.

Nga komunikimi me drejtorinë rajonale të Zonave të Mbrojtura pranohet fakti se ngërçi është te magazinimi, ndërsa po shihet mundësia e zgjidhjes së problemit. Për banorët e Pustecit do të duhen rreth 8000 m3 dru zjarri, të cilat sigurohen në zonat e mbrojtura, pasi bashkia nuk ka sipërfaqe pyjore në pronësi të saj./ CNA