U kap në Gjermani për drogë/ Prokuroria e Korçës dërgon për gjykim trafikantin dhe bashkëjetuesen

24 Nëntor 2023, 11:07, Aktualitet CNA

U kap në Gjermani për drogë/ Prokuroria e Korçës

Prokuroria e Korçës ka dërguar në gjyq dy shtetasit E.D. dhe L.K. për ‘Pastrimi i produkteve të veprës penale’.

Ata akuzohen se fshehën të ardhurat nga trafiku i lëndëve narkotike.

Nga hetimi rezultoi se i pandehuri E.D., ka kryer veprimtari kriminale në fushën e mbajtjes, tregtimit, trafikimit të lëndëve narkotike, që vërtetohet nga dënimi i tij me vendim të formës së prerë për kryerjen e veprës penale “Prodhimi dhe shitja e narkotikëve” parashikuar nga neni 283 i Kodit Penal si dhe arrestimi nga policia federale gjermane për kryerjen e veprës penale “Trafikimi i narkotikëve”.

Nga kjo veprimtari kriminale, i pandehuri ka krijuar pasuri të konsiderueshme, të cilat i ka fshehur duke kthyer në pasuri të paluajtshme, konkretisht ndërtesë trekatëshe në rrugën “Naum Kristo Voskopoja”, Korçë, i cili sipas akt ekspertimit të datës 9.1.2023, rezulton me vlerë tregu 30.550.000 lekë. Këtë pasuri e ka fshehur në emër të shtetases L. K., e cila së bashku me motrën e saj F. M., kanë kursime nga të ardhurat e ligjshme në masën 4 999 042 lekë. Pra vlera e pasurisë së paluajtshme nuk justifikohet me të ardhurat e pronares formale. Shtetasja L.K. është gjithashtu pronare e pasurisë me sipërfaqe 182 m2 ndërtim dhe 147m2 truall si dhe ka subjekt “Linja 150” në emër të saj.

Pastrimi i produkteve të veprimtarisë kriminale të të pandehurit E.D. është kryer me ndihmën e të pandehurës L. K., e cila ka vendosur në emër të saj pasurinë e paluajtshme dhe me kontratë huapërdorje ia ka dhënë shtetases E.M. e cila është bashkëjetuese e të pandehurit.

E. D. është gjithashtu bashkëpronar në pasurinë apartament me sipërfaqe 51.9m2, pronar i automjetit tip Toyota Rav 4, si dhe ka pasur në pronësi dy automjete të tjera.

Ndërsa shtetasja E. M. (bashkëjetuesja) disponon një apartament të blerë me vlerë 50 mijë euro dhe një automjet tip BMW në vlerën e 20.000 mijë euro. Këto pasuri, dyshohet se janë investuar nga shtetasi E. D./ CNA