web counter
LEXO PA REKLAMA!

SHKARKO APP

App Store
Google Play

Thirrja e fortë/ Të ndalen pagesat për inceneratorin e Tiranës, “përbindëshin” e vjedhjes

3 Dhjetor 2024, 19:10, Aktualitet CNA
Thirrja e fortë/ Të ndalen pagesat për inceneratorin e
Landfilli i Sharrës

Një thirrje të fortë ka bërë deputeti i Partisë Demokratike në Kuvend, Luan Baçi, teksa prezantoi amendamentet për buxhetin 2025.

Baçi kërkoi që të hiqet fondi i parashikuar në buxhetin 2025 për inceneratorin e Tiranës, të cilin e quajti “përbindësh” të vjedhjes së fondeve publike.

Ai deklaroi se pagesat duhet të ndalen, ndërsa theksoi se inceneratori i Tiranës nuk ekziston, ashtu sikurse ai i Elbasanit që futet në remont herë pas here dhe ai i Fierit që bën vetëm grumbullimin e mbetjeve.

Pjesë nga deklarata:

Inceneratori i Tiranës, ky përbindësh në letra i vjedhjes së fondeve publike, të mos paguhet më asnjë qindarkë nga taksat e banorëve shqiptarë për vitin 2025. Pra, thjesht të ndalohet vjedhja.

Thirrja e fortë/ Të ndalen pagesat për inceneratorin e
Deputeti i Partisë Demokratike në Kuvend, Luan Baçi

Ju keni projektuar 1.3 miliardë lekë të vjetra të destinuara për inceneratorin e Tiranës. Po mirë, po e pranojmë për momentin se janë të domosdoshme dhe duhen këto para për inceneratorin, po a mund t’i thoni qytetarëve shqiptarë se si do të përdoren këto para? Kush do t’i menaxhojë këto para, se pronarët i keni shpallur gjasme në kërkim. Por së pari mundohuni të na thoni a ka incenerator në Tiranë që ju i jepni para nga taksat e shqiptarëve?

Dihet tashmë edhe ndërkombëtarisht se 3 inceneratorët që ju i propaganduar me aq bujë për trajtimin e mbetjeve ishin një mashtrim dhe vjedhje spektakolare. Ky është një fakt i pamohueshëm edhe nga ju. Ai i Tiranës nuk ekziston fare, i Elbasanit bëri sikur punoi vetëm një vit dhe tashmë hesht sikur të mos ketë ekzistuar asnjëherë. Inceneratori i Fierit ekziston vetëm si vendgrumbullim i mbetjeve dhe ka një godinë që keni futur brenda disa makineri të vjetra, që janë jashtë përdorimit, asnjëherë nuk do të mund të futen në punë. E pra, 3 inceneratorët janë një nga gropat më të mëdha të abuzimit me fondet publike./ CNA





Lajmet e fundit nga