web counter
LEXO PA REKLAMA!

SHKARKO APP

App Store
Google Play

Qendra e Bashkëpunimit Ndërfetar: Qeveria të gjejë zgjidhje të përhershme për situatën e inceneratorit në Elbasan

4 Korrik 2025, 17:23, Aktualitet CNA

Qendra e Bashkëpunimit Ndërfetar: Qeveria të gjejë zgjidhje

Qendra e Bashkëpunimit Ndërfetar ka shprehur sot shqetësimin e thellë lidhur me situatën alarmante të ndotjes së ajrit në qytetin e Elbasanit, si pasojë e mosfunksionimit të inceneratorit ekzistues dhe shpërthimeve të përsëritura të zjarreve në landfill.

Qendra shprehet se kjo situatë përbën një rrezik serioz për shëndetin e qytetarëve dhe një kërcënim të vazhdueshëm për mjedisin dhe të ardhmen e brezave të rinj.

Në këtë kuadër, Qendra e Bashkëpunimit Ndërfetar i bën thirrje Qeverisë të ndërmarrë me urgjencë investimin për ndërtimin e një inceneratori të ri, sipas standardeve bashkëkohore, që garanton mbrojtjen e mjedisit dhe shëndetit publik.

Qendra u bën thirrje organeve të drejtësisë të hetojnë me përparësi dhe të çojnë përpara drejtësisë të gjithë ata individë apo struktura që kanë abuzuar me fondet dhe menaxhimin e inceneratorit të mëparshëm, tashmë jashtë funksionit.

Kërkohet nga institucionet vendore dhe kombëtare të bashkëpunojnë ngushtësisht për të ofruar një zgjidhje të qëndrueshme dhe afatgjatë për këtë problem që përsëritet çdo vit.

Qendra e Bashkëpunimit Ndërfetar beson se një mjedis i pastër, i krijuar nga Zoti, është një e drejtë themelore për çdo qytetar dhe një detyrim moral për çdo shoqëri që synon zhvillim të qëndrueshëm, drejtësi dhe mirëqenie për të gjithë./CNA





Lajmet e fundit nga