Provat e SPAK: Beqaj pronari faktik i restorantit 'GZONA'

7 Korrik 2024, 19:57, Aktualitet CNA

SPAK është bazuar në fakte dhe prova të reja për të akuzuar ish-ministrin e Shëndetësisë Ilir Beqaj, si pronar faktik të restorantit GZONA.

Nga përgjimet dhe provat e siguruara nga oficerët e BKH, kuptohet qartë, që të gjithë punonjësit e restorantit janë në dijeni që pronari është ish-ministri i Shëndetësisë Ilir Beqaj. SPAK ka siguruar komunikimet e punonjësve të restorantit të cilët i raportojnë për largimet nga puna.

Në përgjime administratori i restorantit ‘Gzona’, Gazment Prenga teksa bisedon me ish-punonjësin Vladimir Prenga i thotë se Ilir Beqaj i ka të gjitha dhe se për ‘çdo gjë vendos Ermali’. Sipas SPAK nga këto biseda kuptohet që komunikimet me personelin dhe kontrollin në këtë restorant Ilir Beqaj i kryen nëpërmjet Ermal Kurtulaj.

Familjarët e ish-ministrit, pikërisht vajza e tij Deborah del në përgjime që ka dijeni mbi zhvillimet dhe interesohet për ecurinë e restorantit. Në biseda kuptohet që edhe mjeti Wolsvagen Tuareg në pronësi në Ermal Kurtulajt është në të vërtetë makina e Ilir Beqajt.

Për të vërtetuar se Ilir Beqaj është pronari faktik i restorantit ‘Gzona’, SPAK ka administruar dhe përgjimet e vajzës së tij Deborah Beqaj. Vajza e Beqajt në një bisedë duket se ka dijeni për ndryshimet e bëra në ambientin e lokalit por dhe interesohet sesi ka kaluar një e njohura e saj, në një darkë që kishte qenë aty.

Provat e SPAK: Beqaj pronari faktik i restorantit 'GZONA'

Deborah Beqaj: Si kaluat mbrëmë?

Ada Cuci: Mirë shumë. Te Gzona është bërë shumë nice me ndryshimet e reja

Deborah Beqaj: Kanë bërë shumë. Ka ardh një cun i ri që merret aty. Është shtruar poshtë me drasa dhe është bërë me 2 pjesë.

Përfshirja e restorant GZONA vërtetohet dhe nga dëshmia e Alfred Nikollës, drejtorit ekzekutiv të firmës që fitoi tenderin për të organizuar evenimentin ‘FESTA’. Festa ishte tenderuar dhe nga ministria e Turizmit por sipas Alfred Nikollës angazhimin më të madh e ka marrë Ermal Kurtulaj dhe GZONA.

Madje sipas dëshmisë së Nikollës, shefi i guzhinës së GZONËS, Bleri Dervishi është ai që ka përgatitur ushqimet për festën. Bleri Dervishi rezulton se ka fituar dhe një projekt start upi nga Ministria e Shtetit për Mbrojtjen e Sipërmarrjen me vlerë rreth 100 milionë lekë.

‘Me sa mbaj mend në total vlera e kontrates ka qënë rreth 140.000 euro. Me sa mbaj mend nga informacioni që kam, shërbimin e kateringut e ka lëvruar restoranti Gzona që ndodhet te Kalaja e Tiranës. Me sa mbaj mend në diskutime në zyrë me ekipin është permendur emri i shefit të kuzhinës Bleri, një shef kuzhine tjetër që unë e kujtoj është shef Fredi. Por nuk kam dijeni sesi është përzgjedhur konkretisht restoranti Gzona pasi nuk e kam përzgjedhur unë’.

Në bisedat e siguruara nga SPAK, Ermal Kurtulaj si njeri i besuar i Ilir Beqajt flet me shoferin e këtij të fundit, në lidhje me disa shërbime që ishin bërë makinës.

Kjo makinë sipas SPAK, i përket ish-ministrit të Shëndetësisë dhe e ka përdorur në kohën kur ka qenë deputet. Ermal Kurtulaj dhe Arben Dani diskutojnë midis tyre për problematikat e mjetit dhe pranojnë se ai është i Ilir Beqajt.

Ilir Beqaj doli të shtunën para gjykatës duke kërkuar që të lihej i lirë. Madje ai shprehu gatishmërinë para gjykatës për të lënë garanci 50 mijë euro. Po ashtu dhe krahu i tij i djathtë Ermal Kurtulaj kërkoi të linte garanci pasurore.

Po kërkesat e tyre nuk u morën parasysh nga gjykata, e cila vendosi ‘Arrest në burg’ për Ilir Beqajn dhe Ermal Kurtulajn. Alfred Nikollajt iu dha masa ‘Arrest Shtëpie’.

Ndërsa për Elton Marinin u la në fuqi arresti në shtëpi ndërsa Bledar Leka e Bjona Ziaj u njohën me masën detyrim paraqitje.