E fundit!

09:23 Aktualitet

Shqipëria avancon në negociatat me BE-në, sot hap i ri drejt integrimit europian

Shqipëria shënon një tjetër moment të rëndësishëm në rrugë...

Protesta e kamionistëve në RMV/ 370 automjete bllokojnë sot pikat kufitare, kufizime edhe në Qafë-Thanë

26 Janar 2026, 11:09, Aktualitet CNA

Protesta e kamionistëve në RMV/ 370 automjete bllokojnë sot pikat

Rreth 370 automjete të tonazhit të rëndë pritet të bllokojnë sot rreth mesditës të gjitha pikat kufitare në Maqedoninë e Veriut duke ndalur transportin e mallrave drejt Bashkimit Europian dhe tranzitin nëpër rajon.

Protesta vjen si pasojë e sistemit të ri të hyrje-daljes në zonën Shengen, i cili kufizon qëndrimin e shoferëve nga Ballkani Perëndimor.

Sipas kamionistëve, gjatë bllokadës do të lejohen të qarkullojnë vetëm mjetet që transportojnë ilaçe, kafshë të gjalla, eksplozivë dhe municion. Protestuesit paralajmërojnë se bllokimi do të zgjasë deri në shtatë ditë, ndërsa janë të gatshëm ta ndërpresin protestën nëse Bashkimi Europian nis negociata për zgjidhjen e këtij problemi.

Pavarësisht grevës së paralajmëruar në doganën e Qafë-Thanës janë regjistruar hyrje të pakta kamionësh dhe mjetesh të tjera të transportit nga Maqedonia e Veriut. Kamionët kanë kryer procedurat doganore në të dyja pikat doganore dhe më pas i janë nënshtruar kontrollit në skaner. Kamionistët shprehen se greva lidhet me numërimin e ditëve të qëndrimit në vendet e Bashkimit Europian, të cilat tashmë do të llogariten, duke kufizuar ndjeshëm aktivitetin e tyre.

“Këto protesta po zhvillohen për shkak të Bashkimit Evropian dhe vendosjes së vizës Shengen. Për ne kjo është një goditje e madhe, sepse na kufizuan numrin e ditëve të qëndrimit. Tani mund të qëndrojmë vetëm rreth 90–130 ditë në vit dhe kjo e bën të pamundur punën për shoferët, transportuesit dhe bizneset. Deri tani udhëtonim dhe punonim pa vizë. Tani Bashkimi Evropian vendosi vizë dhe kjo i ndalon shoferët të vozisin dhe kompanitë të funksionojnë normalisht. Derisa të merret një vendim, askush nuk mund të punojë si më parë. Na kanë kufizuar ditët e qëndrimit dhe kjo e bën të pamundur punën. Nëse nuk punojmë, nuk kemi të ardhura dhe familjet tona mbeten pa bukë”,-tregon një kamionist.

Sipas kamionistëve, Ministria e Transporteve e Maqedonisë së Veriut e ka mbështetur këtë grevë, ndërsa pritet një reagim nga vendet e Bashkimit Europian për kërkesat e transportuesve. Kamionistët paralajmërojnë se nëse nuk gjendet një zgjidhje, protestat do të vijojnë, duke rrezikuar furnizimin me mallra dhe stabilitetin ekonomik në rajon./CNA