E fundit!

09:23 Aktualitet

Shqipëria avancon në negociatat me BE-në, sot hap i ri drejt integrimit europian

Shqipëria shënon një tjetër moment të rëndësishëm në rrugë...

"Nuk e kam kuptuar se ishin të shtëna me armë"/ Arjan Ndoja dëshmon në GJKKO për atentatin në Shkozet

23 Prill 2026, 15:47, Aktualitet CNA

Ish-prokurori Arjan Ndoja ka dëshmuar sot në Gjykatën e Posaçme për atentatin që i është bërë në vitin 2019 në Shkozet. Asokohe viktimë mbeti Andi Maloku, shoferi i tij, ndërsa u plagosën vetë Arjan Ndoja, si dhe Aleksandër Laho, i njohur si “Rrumi i Shijakut”.

Gjatë dëshmisë së tij, Ndoja ka treguar lëvizjet e tij ditën e atentatit, ku është shprehur se momenti që kanë nisur të shtënat dhe automjeti ka dalë nga rruga, ka zgjatur 20 sekonda. Ai tha se pas të shtënave, Andi Maloku ishte ai që ka lajmëruar se i kanë qëlluar.

Ndër të tjera ka deklaruar se nuk i njeh as të pandehurit dhe as të bashkëpandehurit e procesit gjyqësor dhe se deri ditën e ngjarjes nuk kishte konstatuar asgjë të dyshimtë. Ai ka shtuar më tej se prej sulmeve politike ndaj tij në atë periudhë për shkak të postit, kishte dyshime nëse mund të ishte vënë nën survejim nga struktura shtetërore.

Dëshmia e plotë:

Në 2019 kam qenë prokuror në Durrës. Përveç anatemimit që më kanë bërë figura të larta politike, nuk kam pasur asnjë lloj problematike tjetër, kam pasur në pronësi një automjet familjar që ishte në emër të bashkëshortes time. Një muaj para se të ndodhte një ngjarje që e ka përdorur shtetasi i ndjerë Andi Maloku.

Në datën 1 nëntor 2019 kam dal nga shtëpia si zakonisht në orën 7 të mëngjesit kam shkuar tek puna me Andi Malokun. Rreth orës 12 kam dalë nga puna dhe jam zhvendosur në drejtim të lokalit me emrin koral pasi kam qenë i ftuar për drekë me disa persona mes tyre Aleksandër Laho. Nga ora 13:00 deri rreth orës 16:00 kam qëndruar aty, kemi qenë më dy makina, jemi zhvendosur në drejtim të urës së Dajlanit. Në drejtim të automjetit ishte Andi Maloku pasi unë nuk ndihesha mirë. Unë ndodhesha në vendin e parë dhe Aleksandër Laho ishte mbrapa, ai kishte dhe makinën e tij por erdhi me mua për të bërë muhabet. Kur kam dal nga lokali deri kur ka ndodhur ngjarja nuk kam konstatuar asgjë të dyshimtë.

Kur kemi kaluar gomisterinë që nis kilometri i parë i autostradës deri tek ura e Shkozetit kanë nisur krismat, automjeti im ishte në karrexhatën ngjitur me trafikndarësen. Në momentet e para nuk e kam kuptuar se ishin të shtënat me armë zjarri. Krismat nuk kanë qenë me breshëri, kanë qenë të ndara. Kanë qenë dy armë pasi bënin zhurma të ndryshme. Dhe intervali i kohës i gjuajtjes, që kur kanë filluar krismat deri kur automjeti ka dalë nga rruga ka zgjatur rreth 20 sekonda. Kur u plagos i ndjeri Andi Maloku ai i dha gaz makinës dhe kemi goditur një nga barrierat e rrugës dhe kemi përfunduar jashtë rruge. Kur kemi dal nga rruga dhe ka ndalu se ka ngec makina në kanal vetëm Andi Maloku ishte me i vetëdijshëm dhe ai ka marrë babin në telefon dhe i ka thënë babë na kanë gjujt. Kur kam tentuar të dal nga makina kam humbur ndjenjat dhe nuk më kujtohet më. Ndërsa Andi Maloku u rrëzua kur hapi derën sepse mesa duket plumbin e kishte në shtyllë kurrizore.

Nuk kam mësuar as më pas se kush na ka qëlluar. Për Andi Malokun kam dërgu njerëzit e mi që të interesoheshin për gjendjen e tij shëndetësore. Familjarët nuk dinë asgjë por as i ndjeri nuk ka parë gjë se ato nuk kanë qëlluar paralel kanë qëlluar nga mbrapa. Përveçse nga ju si organ prokurorie, apo edhe nga vendimet gjyqësore, nuk ka ardhur askush të na takojë dhe të na thotë se ka ndodhur kjo gjë e arsyen pse e kanë bërë këtë gjënë. Të pandehurit e këtij procesi por gjithashtu edhe të bashkëpandehurit në një procedim të lidhur, unë nuk i njoh. Plaurent Dervishin e njoh si emër se ka pasur një procedim në Durrës.

Unë pushimet në 2019 i kam bërë në Shëngjin pasi kam një shtëpi atje. Unë përgjithësisht për drekë ulesha tek Koral dhe tek një lokal Kamelia tek shkëmbi i Kavajës. Përpara ngjarjes unë nuk kam parë asgjë të dyshimtë. Për shkak të sulmeve politike unë kam pasur dyshimet mos më kanë vënë shërbime të posaçme të policisë, për shkak të vettingut të famshëm, që shumica prej jush e kanë kaluar me sukses. Nuk kam pas dyshime zoti prokuror se po të kisha pasur dyshime nuk do rrija në rrugë që të mësonin dorën në mua. Erjol Halilajn kur e kam parë në gjyq jam kujtuar që e kam pas parë në Durrës.

Tek unë nuk ka ardhur askush për të na takuar, por di që tek familja e Andit kanë vajtur 3-4 veta për tu takuar. Por më mirë e di babi i Andit, që ju e keni edhe dëshmitar. Mua s’me ka sjell askush porosi. Rastësisht në gjykatën e Durrësit kam takuar xhaxhin e Eriol Halilajt, më tha që kishte dashtur të vinte të më takonte, i thashe pse nuk vjen, më tha por ja nipi im. I thashë po cfare di ti për nipin. /CNA