"Mos u merr me punët e të tjerëve, si fabula e dhelprës me rrushin"/ Akademiku i përgjigjet Mukës

11 Maj 2026, 07:54, Aktualitet CNA

"Mos u merr me punët e të tjerëve, si fabula e dhelprës

Akademiku shqiptar, Arben Merkoçi ka reaguar pas akuzave të pedagogut Taulant Muka, se merr pagesa nga shteti shqiptar dhe në artikujt e tij shkencor, identifikohet vetëm me Spanjën ku dhe jeton.

Në përgjigje të akuzave nga Muka se merr mijëra euro për konferenca në Shqipëri, Merkoçi shprehet se në këto aktivitetet merr pjesë vetëm me shpenzimet e tij. Sipas tij nga këto konferenca janë realizuar projekte të Bashkimit Europian, si edhe bashkëpunime të tjera akademike e shkencore.

Ndërkohë ka mohuar që të jetë pjesë e ndonjë bordi apo universiteti privat në Shqipëri. Më tej lidhur me Qendrën Rajonale të Nanotekbologjisë pranë Akademisë që ai drejton, Merkoçi thotë se po punon ta ngrejë me kolegë nga rajoni dhe mbështetjen e qeverisë.

"Vazhdo punën, i nderuar, pa u marrë me punën e të tjerëve dhe pa hedhur në qarkullim gjëra të pavërteta, ndoshta si në fabulën e dhelprës me rrushin", thuhet ndër të tjera në përgjigjen e tij.

Reagimi i plotë:

Akademiku shqiptar nga Spanja është krenar të jetë pjesë e Akademisë në vendin e tij të origjinës, përkrah ish-profesorëve dhe kolegëve të nderuar, ndërkohë që vazhdon punën si profesor në Spanjë.

Megjithëse aktualisht nuk jam pjesë e ndonjë bordi apo universiteti privat në Shqipëri, do të ishte kënaqësi për mua të kontribuoja edhe më shumë për vendin tim, nëse koha do të ma lejonte.

Jam po ashtu krenar për ato kongrese që disa i quajnë “pompoze”. Këto aktivitete sjellin në Shqipëri ekspertët më të mirë të nanoteknologjisë nga e gjithë bota, përfshirë edhe mua, të cilët marrin pjesë me shpenzimet e tyre, duke krijuar mundësi reale bashkëpunimi për kolegët nga universitetet shqiptare. Falë këtyre lidhjeve janë realizuar projekte të Bashkimit Europian, si edhe bashkëpunime të tjera akademike e shkencore.

Përfitimi im i vetëm nga këto evente është kënaqësia për të parë miq dhe personalitete të fushës sime të vijnë në Tiranë dhe të kontribuojnë në zhvillimin akademik e shkencor të vendit.

Ashtu siç jam anëtar i disa akademive të huaja, marr honoraret e përcaktuara nga shteti, njësoj si edhe kolegët e tjerë akademikë.

Është kënaqësi të vazhdoj punën që bëj prej shumë vitesh dhe të kontribuoj, sadopak, për Shqipërinë me gjithçka kam mundur të jap deri më sot. Në fund të fundit, kjo është ajo që di të bëj më mirë.

Lexo më shumë, ti dhe ndjekësit e tu, për Qendrën Rajonale të Nanoteknologjisë (për momentin virtuale), pranë Akademisë, të cilën po përpiqemi ta ngremë bashkë me kolegë nga rajoni dhe më gjerë, me mbështetjen e qeverisë.

Është një qendër që synon të sjellë në Shqipëri modelin e qendrës ku unë punoj në Spanjë dhe të nxisë frymën e bashkëpunimit midis kërkuesve shkencorë në rajon, si edhe përpjekjet e tyre për të zhvilluar punë shkencore, pavarësisht mungesave që ende ekzistojnë.

Vazhdo punën, i nderuar, pa u marrë me punën e të tjerëve dhe pa hedhur në qarkullim gjëra të pavërteta, ndoshta si në fabulën e dhelprës me rrushin.

Të uroj shëndet! /CNA