“I shërbeva si qeni, firmos ne, të gjithë si delet"/ Zbardhet përgjimi, si u fundos Jonaid Myzyri

18 Korrik 2025, 14:59, Aktualitet CNA

“I shërbeva si qeni, firmos ne, të gjithë si delet"/

Gazetarja Klodiana Lala ka mësuar detaje nga dosja hetimore e kreut të KPP-së, Jonaid Myzyri.

Sipas gazetares, është zbardhur përgjimi i një punonjëseje të Komisionit të Prokurimeve Publike, Lindita Skeja, nga e cila hidhen dhe dyshimet për abuzimin e tenderit 2.3 mln euro, të mirëmbajtjes së rrugës 58.7 km, “Rrëshen (Ura e Fanit) – Shpal, Shpal – Ura e Repsit”.

Biseda telefonike e përgjuar e punonjëses së KPK-së, Lindita Skeja, implikon titullarin në procedurat abuzive të tenderit.

Sipas detajeve të siguruara nga gazetarja Klodiana Lala, punonjësja Skeja i ankohet bashkëbiseduesit në telefon se kishte firmosur si dele, siç i ishte kërkuar nga Myzyri, ndërsa tani asaj i duhej të paraqitej për t’u marrë në pyetje.

Përgjimi

Speaker A (Lindita): Ai na majti kshu… që krijum besim që ne jemi miqtë e atij…ene rrimë të qetë. N’a ofroi mori informacione. Unë vajta dhe i shërbeva si qeni.

Speaker B: Hej zot!

Speaker A (Lindita): Vajta i shërbeva si qeni. I shërbeva me sy mbyll… e du edhe pikë. E du kshtu…firmos ne, të gjith si delet. Ime veme ku të n’a thërrasin. Rresht. Firmën ne e lekët ata.

Speaker B: A mos i hongert o Zot.

Speaker A (Lindita): Bojna se e dini ju se ç’ju boj unë, bojna…Më pas

Speaker A (Lindita): Amin…ata hop mrap ere… hop mrapa… hop mrapa me e çoi mu në KPP… më çoi mu në KPP, përballem atje me lloj lloj pislliku…

Speaker B: Pi hiç ere un sve po ene tha Dashi motrës tha mos shko…

Në dosjen hetimore, Prokuroria e Posaçme thekson se “nga rezultati i përgjimeve ngrihen dyshime të arsyeshme që në vendimmarrjen e KPP-së për shqyrtimin e ankesës me objekt: “Mirëmbajtje rutinë me performancë rruga Rrëshen (Ura e Fanit) – Shpal, Shpal-Q.Bene – Hadroj, Shpal – Ura e Repsit”, me fond limit 219.866.693 lekë pa TVSH si dhe në vendimmarrje të tjera, ekzistojnë elementë të veprimeve të kundërligjshme që mund të kenë ndikuar në këto vendime”.

SPAK-u është duke hetuar procedurat e tenderëve përgjatë viteve 2020-2023 pasi ka dyshime të forta se janë zhvilluar pa garë, pasi në shumë raste rezulton pjesëmarrëse vetëm një kompani, e në raste të tjera, shoqëritë janë skualifikuar në mënyrë të padrejtë./ CNA