Zbardhet vendimi i Gjykatës së Strasburgut për vrasjen e Aleks Nikës: Shkeljet e kryera nga shteti

14 Nëntor 2023, 10:49, Aktualitet CNA

Zbardhet vendimi i Gjykatës së Strasburgut për vrasjen e Aleks

21 Janar 2011

Vrasja dhe moszbardhja e ngjarjes, dy shkelje të kryera nga shteti. Ky është vendimi që ka dhënë gjykata e Strasburgut për vrasjen e Aleks Nikës, të ndodhur në bulevardin "Dëshmorët e Kombit" më 21 janar të 2011.

Në përfundim të çështjes së gjykuar sqarohet se gjykata ka gjetur mangësi në kuadrin ligjor që rregullon përdorimin e armëve potencialisht vdekjeprurëse.

"Gjykata ka gjetur mangësi në kuadrin ligjor që rregullon përdorimin e armëve potencialisht vdekjeprurëse në lidhje me operacionet e kontrollit të turmës në përgjithësi, defekte serioze në planifikimin dhe kontrollin e ngjarjes në shqyrtim dhe një dështim për të demonstruar se përdorimi i forcës vdekjeprurëse nga oficerët e Gardës Kombëtare që rezultoi në vdekjen e anëtarit të familjes së aplikantit ishte absolutisht e nevojshme, duke pasur parasysh rrethanat. Qeveria ka pranuar se një përdorim i tillë i forcës ishte joproporcional!'

Po ashtu në vendimin e gjykatës ngrihet shqetësimi se fshirja e pamjeve filmike nga kamerat e sigurisë menjëherë pas ngjarjes, e cila ngre dyshime të forta se fshirja ka qenë e qëllimshme për fshehjen e së vërtetës.

“Më e rëndësishmja, fakti se një pjesë e madhe e regjistrimeve video u fshinë menjëherë pas këtij incidenti, siç përcaktohet nga gjykatat kombëtare, ngre shqetësime serioze nëse fshirja e tyre mund të ketë qenë e qëllimshme dhe e kryer me qëllim fshehjen e së vërtetës. Këto dyshime u evidentuan edhe nga procedurat e autoriteteve vendase, të cilat nuk ishin në gjendje të përcaktonin rrethanat e sakta dhe identitetin e personit/personave që kishte urdhëruar dhe kryer fshirjen e regjistrimeve. Përveç pyetjes nëse fshirja e regjistrimeve mund t'i atribuohen qeverisë së paditur, Gjykata ka vënë re se regjistrimet u ruajtën në një disk të jashtëm që ndodhej në sallat e serverit të Kryeministrisë", thuhet në vendim.

Aleks Nika mbeti i vrarë në protestën e 21 janarit 2011 në bulevardin “Dëshmorët e Kombit”, bashkë me 3 protestues të tjerë. Ishin familjarët e Nikës ata që dërguan padi në Gjykatën Evropiane për të Drejtat e Njeriut.

Më herët Prokuroria e Tiranës rihapi hetimin për vrasjen e Aleks Nikës, ndërsa familjarët kanë kërkuar që çështjen ta marrë SPAK-u.

Pas skandalit me videon Meta-Prifti, Partia Socialiste thirri një protestë qytetare. Protesta precipitoi në dhunë dhe krisma nga të cilat mbetën të vrarë Hekuran Deda, Ziver Veizi, Faik Myrtaj dhe Aleks Nikaj.

Ky i fundit, pas mjekimit paraprak në Spitalin Ushtarak të Tiranës, është dërguar për kurim të mëtejshëm në Turqi, ku dhe vdiq pas disa ditësh./CNA