Dosja "5D"/ Apeli i GJKKO-së ndryshon masën e sigurisë për ish-drejtorin e Bashkisë së Tiranës

30 Qershor 2026, 14:42, Aktualitet CNA

Dosja "5D"/ Apeli i GJKKO-së ndryshon masën e sigurisë

Apeli i Gjykatës së Posaçme ka ndryshuar masën e sigurisë për ish-drejtorin e IMT-së, Mariglen Qato, një nga të pandehurit e dosjes "5D". Gjyqtarja Iliriana Olldashi vendosi zëvendësimin e masës “arrest në burg” me masën “arrest në shtëpi”.

Sipas vendimit, Qato nuk duhet të largohet nga banesa e tij. Gjykata ka urdhëruar lirimin e tij nga ambientet e paraburgimit, nëse nuk mbahet i ndaluar për ndonjë shkak tjetër.

“Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtare Iliriana Olldashi, sot më datë 30.06.2026, shpalli vendimin mbi çështjen penale nr. 184 akti, datë 22.06.2026 regjistrimi, mbi ankimin e ankuesit M.Q: “Ankim ndaj vendimit nr. 355, datë 21.05.2026, të Gjykatës së Posaçme të Shkallës së Parë për Korrupsionin dhe Krimin e Organizuar, me objekt: Zëvendësim mase sigurimi” dhe vendosi: Ndryshimin e vendimit nr. 355, datë 21.05.2026 të Gjykatës së Posaçme të Shkallës së Parë për Korrupsionin dhe Krimin e Organizuar në këtë mënyrë: Pranimin e kërkesës së kërkuesit/të pandehurit M.Q. Zëvendësimin e masës së sigurimit personal me efekt shtrëngues “arrest në burg” të cakuar ndaj tij me vendimin nr. 28, datë 28.03.2024 të Gjykatës së Posaçme të Shkallës së Parë për Korrupsionin dhe Krimin e Organizuar me masën e sigurimit personal “arrest në shtëpi”, duke e urdhëruar të pandehurin M.Q, që të mos largohet nga banesa e tij e ndodhur në ***.

Urdhërohet lirimi nga ambientet e paraburgimit i të pandehurit M.Q, në rast se nuk mbahet për ndonjë shkak tjetër. Urdhërohet Prokuroria e Posaçme Kundër Korrupsionit dhe Krimit të Organizuar, për ekzekutimin e këtij vendimi”, thuhet në njoftimin e gjykatës.

Nga hetimet e SPAK-ut ka rezultuar se Redi Molla dhe Mariglen Qato janë ortakët e vërtetë dhe pronarët “de facto” të shoqërisë “5D Konstruksion” sh.p.k., duke përfituar një sërë tenderësh.

Molla dhe Qato e kanë zotëruar këtë shoqëri tregtare në mënyrë indirekte, duke përdorur persona të tjerë, shtetasit E.M., M.P. dhe N.M., si ortakë fiktivë në aktet e regjistrimit dhe funksionimit të shoqërisë, me të cilët ortakët e vërtetë të shoqërisë kanë pasur lidhje shoqërore dhe lidhje miqësore. /CNA