web counter
LEXO PA REKLAMA!

SHKARKO APP

App Store
Google Play

E fundit!

x

Bashkia Maliq angazhohet në zbatimin e Kartës Europiane për Barazi

1 Korrik 2025, 15:05, Aktualitet CNA

Bashkia Maliq angazhohet në zbatimin e Kartës Europiane për

Bashkia Maliq ndërmori sot një hap të rëndësishëm drejt ndërtimit të një shoqërie më të barabartë për të gjithë, duke nënshkruar Kartën Europiane për Barazinë e Grave dhe Burrave në Jetën Vendore. Me këtë akt, bashkia zyrtarizon angazhimin e saj për të promovuar dhe zbatuar parimin themelor të barazisë gjinore në të gjitha fushat e jetës publike dhe institucionale.

Ceremonia u zhvillua nën kujdesin e kryetarit të bashkisë, z. Gëzim Topçiu, dhe u mbështet nga UN Women dhe Bashkimi Europian, në kuadër të projektit “Bashkimi Europian për Barazinë Gjinore” (EU4GE), i financuar nga Bashkimi Europian.

Në ceremoninë e nënshkrimit ishte e pranishme znj. Erisa Çela, Drejtuese e Programeve të UN Women në Shqipëri si dhe znj. Jenni Lundmark, Oficere Programi për zhvillimin e sektorit privat dhe barazinë gjinore, pranë Delegacioni i Bashkimit Europian në Shqipëri. Në këtë aktivitet morën pjesë gjithashtu anëtarë të Këshillit Bashkiak, përfaqësues të institucioneve vendore, organizatave të shoqërisë civile, universiteteve, si dhe punonjëse e punonjës të administratës vendore.

Me këtë nënshkrim, Bashkia Maliq i bashkohet një rrjeti prej 2,044 bashkish nënshkruese të Kartës në 36 vende europiane, nga të cilat 20 në Shqipëri. Bashkitë nënshkruese marrin përsipër përgjegjësi dhe ndërmarrin veprime konkrete në fushën e barazisë gjinore dhe fuqizimit të grave. Ky është një hap i përbashkët në përpjekjen për të adresuar sfidat e shumta që ende pengojnë gratë dhe burrat, të rejat dhe të rinjtë, vajzat dhe djemtë të gëzojnë të drejta të barabarta në jetën shoqërore, politike dhe ekonomike. Për më tepër, kjo nismë do t’i mundësojë Bashkisë Maliq të përfitojë nga përvoja dhe praktikat më të mira europiane, si dhe të zgjerojë bashkëpunimin ndërkombëtar në fushën e barazisë gjinore.

Karta Europiane për Barazi, përmes 39 neneve të saj, ofron një kuadër udhërrëfyes se si bashkitë dhe qarqet mund të punojnë në mënyrë efektive për përmirësimin e barazisë gjinore në fusha të ndryshme të kompetencave të tyre. Hapi i radhës dhe thelbësor pas këtij angazhimi është përgatitja dhe miratimi i një Plani Vendor Veprimi për Barazinë Gjinore. Zbatimi i vazhdueshëm i këtij plani, me burime të dedikuara dhe përgjegjshmëri të lartë, do të jetë udha jonë drejt arritjes së një barazie të plotë gjinore./ CNA





Lajmet e fundit nga