web counter
LEXO PA REKLAMA!

SHKARKO APP

App Store
Google Play

Avokatja e Popullit, krah SPAK-ut/ “Theu mitin e pandëshkueshmërisë”

13 Prill 2024, 19:00, Aktualitet CNA
Avokatja e Popullit, krah SPAK-ut/ “Theu mitin e
Avokatja e Popullit, Erinda Ballanca

Avokatja e Popullit, Erinda Ballanca, ka folur me superlativa për SPAK-un, teksa tha se ka thyer mitin e pandëshkueshmërisë në vendin tonë.

Ballanca tha në një intervistë me Nisida Tufën se SPAK-ut i është dashur një kohë e gjatë për të arritur pritshmëritë e qytetarëve dhe për të arritur qëllimin kryesor.

“Një nga rezultatet reale të reformës është pikërisht fakti se asnjëri nuk mendon sot se është i pandëshkueshëm. Dhe kjo është meritë e Strukturës së Posaçme.

Unë së pari dua të them se SPAK-u ka arritur të realizojë atë që kanë qenë një nga qëllimet e Reformës në Drejtësi, të prekë pandëshkueshmërinë dhe kjo është një arritje shumë e mirë. Sigurisht, që duhet një kohë e caktuar për të bërë hetime të plota, të vërteta, hetime që nxjerrin rezultate të qenësishme dhe të nxjerrin prova që para gjykatës të qëndrojnë.

SPAK-ut sigurisht që i është dashur një kohë e caktuar të bëjë atë punë. Ka pasur numra shumë të vegjël, nuk ka pasur stafet e duhura, ka pasur një sërë elementës, të cilët në momentet e para ishte një kohë e nevojshme për ta ngritur dhe për ta krijuar strukturën, por sigurisht dhe për të krijuar kuptimin realisht të pozicionit, pritshmërive të qytetarëve dhe për të realizuar atë që ishte qëllimi e vullneti i tyre.

Nga ana tjetër, ajo që unë kam vërejtur dhe jo pa qëllim, është se për shkak të këtij suksesi ndodnjëherë ka edhe momente që për hir të qëllimit, herë pas here anashkalohet apo bëhet një interpretim i orientuar drejt rezultatit edhe për disa të drejta, të cilat janë të rëndësishme në këndvështrimin e Avokatit të Popullit”, theksoi Ballanca.

Ajo deklaroi se prokurorët e SPAK duhen inkurajuar në punën e tyre, pasi përballen me kosto personale.

“Po bëjnë një punë që nuk është e thjeshtë, po bëjnë një punë e cila ka risqe jo të vogla edhe personale, edhe individuale, por janë duke çuar përpara një reformë, e cila do ta ketë pikërisht këtë aspekt të saj si pjesën më të bukur, më të mirë dhe më të arrirë. Ka shumë aspekte të reformës, të cilat nuk janë aq pozitive, por nga ana tjetër është e rëndësishme është që të kuptojmë se askush nuk duhet të shkelë ligjin sepse kushdo mund edhe të dënohet. Është rrëzuar miti i pandëshkueshmërisë, por ama duhet të kemi rezultate konkrete që të mos përsëritet më”, nënvizoi Avokatja e Popullit./ CNA





Lajmet e fundit nga