web counter
LEXO PA REKLAMA!

SHKARKO APP

App Store
Google Play

E fundit!

x

Atmosferë Krishtlindjesh/ Korça, si pikëtakim për të gjithë shqiptarët

25 Dhjetor 2025, 12:43, Aktualitet CNA

Atmosferë Krishtlindjesh/ Korça, si pikëtakim për të

Korça është mbushur me atmosferë festive në ditët e Krishtlindjes, duke u shndërruar në një pikë takimi për qytetarë nga e gjithë Shqipëria, por edhe për emigrantë që janë kthyer nga Greqia për të festuar pranë familjeve të tyre.

Dekorimet, dritat shumëngjyrëshe dhe gjallëria në rrugët e qytetit kanë krijuar një klimë të veçantë gëzimi dhe harmonie. Qytetarët shprehen se Krishtlindja mbetet një nga festat më të rëndësishme familjare, e cila festohet kryesisht në shtëpi, pranë prindërve dhe të afërmve, duke ruajtur traditat ndër breza.

Shumë prej tyre tregojnë se kanë ardhur posaçërisht nga Greqia për këto ditë feste, ndërsa të tjerë kanë zgjedhur të qëndrojnë edhe për festimet e Vitit të Ri.

"Krishtlindje të gëzuara dhe gjithë të mirat për gjithë njerëzit. Kam ardhur nga Greqia. I festojmë festat shumë mirë me familjen. Vazhdojmë ta ruajmë traditën."

"Shumë mirë e kalojmë Krishtlindjen, festojmë familjarisht. Sot festoj edhe emrin e vajzës. Jetojmë në Greqi, kemi ardhur vetëm për festat. Do rrime edhe për Vitin e Ri dhe do ikim."

Vizitorë nga qytete të ndryshme të vendit, si Lushnja apo Durrësi, kanë zgjedhur Korçën për të kaluar Krishtlindjen me miq dhe familjarë, duke e cilësuar qytetin si një nga destinacionet më të bukura gjatë kësaj periudhe. Ata theksojnë se atmosfera festive, organizimi i qytetit dhe kushtet e favorshme të motit e bëjnë Korçën tërheqëse për pushime të shkurtra dimërore.

"Vij nga Lushnja, kemi ardhur për 2-3 ditë me disa shokë për Krishtlindje. Uroj nga zemra gëzuar të gjithë shqiptarëve. Është një atmosferë shumë e bukur në Korçë, koha shumë e mirë, pati disa ditë shi por fatmirësisht gjithçka tani është në rregull."

"Dreka sot është në shtëpi, kuptohet me prindërit, kurse në darkë dalim. Ne rrimë në Durrës dhe kemi ardhur sepse kemi prindërit këtu. Korça gjithmonë ka një atmosferë shumë të bukur si çdo vit. Unë jam lindur e rritur në Korçë kështu që Korçën e dua në të gjitha pjesët e saj."

Për shumë familje, festimet e Krishtlindjes shoqërohen edhe me momente të veçanta personale, si festimi i emrit apo i datëlindjeve, duke e bërë këtë ditë edhe më domethënëse.

Korça vijon të ruajë identitetin e saj si qytet i festave, duke ofruar çdo vit një atmosferë të ngrohtë dhe mikpritëse.

Për banorët dhe vizitorët, qyteti mbetet një vend ku tradita, familja dhe gëzimi bashkohen natyrshëm, duke e bërë Krishtlindjen një festë të përjetuar me emocione të veçanta./ CNA





Lajmet e fundit nga