web counter
LEXO PA REKLAMA!

SHKARKO APP

App Store
Google Play

E fundit!

x

"Air Albania" me probleme financiare, nuk paguan 5 mln euro ushqim pasagjerësh

21 Qershor 2025, 18:37, Aktualitet CNA

"Air Albania" me probleme financiare, nuk paguan 5 mln euro ushqim

Kompania e fluturimeve Air Albania duhet t’i paguajë 5 milionë euro një kompanie kateringu që i ofron ushqimet për pasagjerët. Vendimi është marrë nga Gjykata e Apelit të Tiranës e cila ka vendosur që kompania ajore të likuidojë faturat.

Air Albania pretendon se shuma është e mbifaturuar dhe ka kërkuar pezullim të pagesave. Kërkesa e kompanisë u pranua nga Gjykata e Tiranës, por Apeli në maj të këtij viti vendosi që të detyrojë Air Albanian që të paguajë faturat.

Gjykata e Apelit detyron shoqërinë “Air Albania” që të shlyejë rreth 5 milionë euro fatura të prapambetura ndaj një kompanie që e furnizon me ushqimin për pasagjerët në bord.

Ky vendim gjyqësor, megjithëse është marrë në 13 Maj 2025, ende nuk është reflektuar në Qendrën Kombëtare të Biznesit.

Shoqëria e fluturimeve “Air Albania”, refuzon të paguajë faturat e lëshuara nga një biznes në Lushnjë, me pretendimin se është mbifaturuar dhe se pagesat do ta çonin në vështirësi serioze financiare.

“Air Albania” ka nënshkruar në vitin 2019 kontratë me një kompani për furnizimin e ushqimit katering, që përdoret për pasagjerët në bordin e avionit. Gjatë periudhës 2022-2024, kompania furnizuese ka lëshuar më së paku 10 fatura për llogari të “Air Albania”, në një shumë totale që kalon vlerën e 500 milionë lekëve të reja.

Shoqëria “Air Albania” nuk i ka paguar këto fatura, megjithëse rezulton se i ka pranuar si të rregullta në sistemin e vetë të pagesave.

Në Dhjetor të vitit 2024, Gjykata e Tiranës ka pranuar kërkesën e kompanisë së ushqimit dhe ka lëshuar urdhrin e ekzekutimit për ato fatura. Kjo do të thotë se “Air Albania” ishte e detyruar me vendim gjyqësor që të kryente pagesat e pashlyera.

Pas këtij vendimi, kompania e fluturimeve kërkon në Gjykatën e Tiranës pezullimin e pagesave. Në argumentet e saj, “Air Albania” pretendon se kompania që e ka furnizuar me ushqime katering e ka mbifaturuar me një vlerë rreth 1.8 milionë euro.

Shoqëria e fluturimeve deklaron se i ka pranuar faturat e furnitorit me ushqime, por këtë e ka bërë në mirëbesim. Pas një verifikimi të brendshëm, “Air Albania” deklaron se ka zbuluar mbifaturim dhe për këtë arsye nuk ka paguar faturat në vlerë rreth 5 milionë euro, deri sa të zgjidhet përfundimisht kjo çështje.

Gjykata e Tiranës pranon kërkesën e “Air Albania” për pezullimin e pagesave. Ky vendim u shfuqizua më vonë nga Gjykata e Apelit, me vendimin e formës së prerë të datës në 13 maj 2025. Në këtë vendim, “Air Albania” urdhërohet që të kryejë pagesat për detyrimet./ Syri.net





Lajmet e fundit nga