Mbi 4 orë në SPAK/ Elman Abule "kyç gojën"

9 Janar 2025, 14:04, Aktualitet CNA

Pas rreth 5 orësh para prokurorëve të posaçëm, biznesmeni Elman Abule del nga Prokuroria e Posaçme, nuk pranon të përgjigjet para gazetarëve.

Elman Abule është thirrur në SPAK në lidhje me hetimet që po bëhen për kryetarin e Bashkisë së Tiranës, Erion Veliaj.

Më herët janë zbardhur komunikime që tregonin lidhjet e ngushta mes çiftit Abule-Nito dhe çiftit Veliaj-Xoxa.

Sipas komunikimeve që ka në duar SPAK është zbuluar një marrëdhënie tregtare mes sipërmarrëses Marisa Nito dhe Ajola Xoxës.

Xoxe, gruaja e kryetarit të Bashkisë Tiranë, rezulton se ka përfituar disa transaksione bankare nga kompania e Marisa Nitos, bënë me dije burime në dijeni të fakteve. Transaksionet monetare në favor të Ajola Xoxës shkojnë deri në 180 mijë euro, sipas të njëjtave burime.

Kjo marrëdhënie tregtare me përfitime financiare mes sipërmarrëse Nito, dhe bashkëshortes së kryebashkiakut të Tiranës, ka shumë gjasa të rrezikojë edhe pozitën penale të Erion Veliajt, ndërkohë që është nën hetim nga SPAK-u.

Komunikimet dhe provat e tjera që janë tashmë të gjitha në duart e prokurorëve të Prokurorisë së Posaçme, ngrenë dyshime se Marisa Nito dhe Ajola Xoxa përfaqësojnë një botë të errët të biznesit dhe këmbimit të favoreve, duke u varur gjithçka nga influenca e fortë ekonomike dhe politike e bashkëshortëve të tyre, Elman Abule dhe Erion Veliaj.

Dyshja Veliaj-Abule, ndërkohë është e njohur se kanë kontakte të ngushta me njëri-tjetrin, ku së bashku kanë udhëtuar në disa vende të Evropës.

Nga kjo marrëdhënie e ngushtë miqësore dyshohet se Abule ka përfituar leje ndërtimi në Tiranë, ku e fundit ka qenë në zonën e “Kombinatit”, që nuk vu në zbatim pasi pronarët e tokës refuzuan Abulen për shkak të një dënimi në Belgjikë.

Pasi mori në pyetje për 5 orë kryebashkiakun e Tiranës, SPAK-u tha se hetimet janë ende në fazë paraprake, kishin gjetur prova për të paktën katër akuza, konkretisht, korrupsioni pasiv.

Hetimi ndaj Veliajt sipas SPAK-ut vijon për veprat penale “Korrupsion aktiv i funksionarëve të lartë shtetërorë ose të zgjedhurve vendorë” “Pastrimi i produkteve të veprës penale ose veprimtarisë kriminale” dhe “Refuzim për deklarim, mosdeklarim, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë, ose i çdo personi tjetër që ka detyrim ligjor për deklarim”./ CNA