E fundit!

22:46 Aktualitet

Pas ndeshjes, protestuesit zhvendosen te selia e PD-së: Opozitë e shitur

Pas ndeshjes, protestuesit janë zhvendosur para selisë së ...

40% e autobusëve hiqen nga qarkullimi/ Paralajmërojnë përfaqësuesit e shoqatës: Do të ketë përshkallëzim

15 Prill 2026, 09:56, Aktualitet CNA

40% e autobusëve hiqen nga qarkullimi/ Paralajmërojnë

Një situatë e rënduar po zhvillohet në transportin publik të kryeqytetit, ku një pjesë e konsiderueshme e autobusëve urbanë nuk kanë dalë sot në qarkullim. Operatorët kanë vendosur të reduktojnë shërbimin me rreth 40%, duke argumentuar se kostot e rritura, sidomos për karburantin, janë bërë të papërballueshme.

Ky zhvillim vjen pas një periudhe tensionesh mes kompanive të transportit dhe institucioneve shtetërore. Sipas përfaqësuesve të sektorit, përpjekjet për të gjetur një zgjidhje përmes dialogut nuk kanë dhënë rezultat, ndërsa mungesa e reagimit nga autoritetet ka detyruar marrjen e kësaj mase.

Pasojat kanë qenë të menjëhershme për qytetarët. Në shumë linja, autobusët janë më të rrallë dhe më të mbipopulluar, duke rritur ndjeshëm kohën e pritjes dhe duke përkeqësuar kushtet e udhëtimit. Fluksi i shtuar i pasagjerëve pritet të sjellë edhe më shumë probleme në ditët në vijim.

Operatorët paralajmërojnë se kjo është vetëm faza e parë e një përshkallëzimi të mundshëm. Nëse nuk ndërhyhet me masa konkrete, si subvencionimi i drejtpërdrejtë apo lehtësira të tjera financiare, shërbimi mund të reduktohet edhe më tej.

Ndërkohë, qytetarët e Tiranës përballen me një realitet të ri, ku lëvizja e përditshme është bërë më e vështirë dhe më e pasigurt, duke ngritur shqetësime serioze për funksionimin normal të jetës urbane në kryeqytet.

"Na u premtua që do të kishim një reagim shumë të fortë, me datë 7 na u premtua që do të takohemi me ministrat dhe sot është data 15, jo vetëm që ky takim nuk ka ndodhur, por nuk kemi pasur asnjë reagim.

Të gjendur të konsumuar çdo mundësi bashkëpunimi i operatorëve me institucionet, erdhëm në këtë pikë që u detyruam të njoftojmë qytetarët, siç dihet ka qenë njoftimi për qytetarët, që të marrin masa për të ikur në punë dhe në destinacionin e vet, duke dalë më herët, sepse do të ketë 40% më pak autobusë në rrugë.

Praktikisht gjysma e linjave nuk kanë dalë sot në punë. Në qoftë se një linjë operon me 10 autobusë në ditë, ne aktualisht janë gjashtë autobusë në operim, që do të thotë frekuenca është shtuar gjysma e kohës.

Po themi fluksi i njerëzve është dyfishi më i madh. Nuk ka një shërbim, sot edhe këta autobusë që janë do të kenë edhe defekte pa fund, me dyer të thyera, me xhama të thyer, do ta dhunojnë mjetin, qytetarët do të jenë në siklet shumë të madh me njëri-tjetrin. Do të jetë një shërbim katastrofik, po them.

Kjo është një neglizhencë e tejskajshme institucionale, sepse të takohesh, të premtosh, do të merren masa, do të ritakohemi javën tjetër, do të kemi masa konkrete, sepse ishin koshientë që nafta ka shkuar në këto çmime, kemi një rritje me diku 70 lekë të çmimit të naftës nga ai para luftës, janë rritur edhe pjesët e këmbimit për shkak të transportit, të importeve që vijnë.

Kemi një rritje totale të kostove. Kemi dërguar disa pika të cilat ne shpresonim të ketë një ndërhyrje, por ajo më emergjente ishte një subvencion i drejtpërdrejtë, siç u bë edhe, po themi, në luftën e Ukrainës. Na u premtua që do të kemi takim, patëm një heshtje totale.

Ne me mekanizmat tanë të komunikimit jemi munduar vazhdimisht, po edhe me njerëz nëpër institucione, a kemi ndonjë shpresë, ndonjë dritë jeshile, a po merret dikush me këtë punë? Ka një heshtje totale dhe jemi të detyruar në këtë pikë.

Ky është vetëm fillimi i asaj që na na pret në vazhdimësi, sepse do të ketë një përshkallëzim edhe më të madh", tha kreu i shoqatës së transportit urban dhe ndërqytetas, Dashnor Memaj./ CNA