web counter
LEXO PA REKLAMA!

SHKARKO APP

App Store
Google Play

E fundit!

x

Asllani dhe Empoli trembin Interin, zikaltrit përmbysin gjithçka dhe marrin kreun

6 Maj 2022, 19:25, Sport CNA

Interi vuan, por arrin që të përmbysë Empolin 4-2 në ?San Siro? dhe të mbajë gjallë shpresat për titullin kampion në Serinë A. Toskanët trembin seriozisht zikaltrit pasi kalojnë në avantazh të dyfishtë pas 30 minutave lojë, por më pas kampionët e Italisë përmbysin gjithçka me një super Lautaro dhe marrin një fitore me peshë, që i ngjit përkohësisht në krye të renditjes së Serisë A.

Asllani ka bërë një paraqitje shumë të mirë në Milano, madje ka shënuar golin e parë në kampionat kundër Interit, por sërish skuadra e tij ka dalë e humbur nga ?San Siro?-ja.

Java e 36-të e Serisë A është hapur me një superndeshje në “Oversport” dhe “Tibo”. Interi dhe Empoli kanë dhuruar spektakël dhe shumë gola në sfidën e zhvilluar në ?San Siro?.

Empoli tremb Interin pasi kalon menjëherë në avatazh me një ‘ish’ si Pinamonti, që zhbllokon sfidën pas vetëm 5 minutash lojë. Toskanët shënojnë sërish me Zurkovskin, por goli i tij anulohet nga VAR-i. Zikaltrit kanë humbur toruan dhe miqtë godasin sërish me Asllanin, që shënon golin e tij të parë në Serinë A. Nuk kanë kaluar as 30 minuta lojë dhe Interi e sheh veten në disavantazh të 2 golave dhe praktikisht jashtë luftës për titullin kampion.

Kampionët e Italisë mundohen të reagojnë dhe shtojnë presionin në portën kundërshtare. Gjyqtari Manganiello akordon një penallti pas një faulli në dëm të Barelës, por ndërhyn VAR-i dhe e anulon këtë vendim.

Zikaltrit arrijnë të ngushtojnë rezultatin, pasi Romanjoli shënon në portën e tij, ndërsa Lautaro kthen buzëqeshjen e tifozëve të pranishëm në ?San Siro?, duke barazuar shifrat në fund të pjesës së parë.

Interi nis vrullshëm pjesën e dytë në kërkim të golit të avantazhit. Provojnë Perisiç, Lautaro, Shkriniar dhe Barela, por nuk arrijnë ta çojnë dot topin në rrjetë. Zikaltrit dominojnë totalisht sfidën dhe është radha e Dumfrisit, që të vërë në provë portierin Vicario.

Goli është në ajër dhe pak minuta më vonë është sërish Lautaro ai që dërgon topin në rrjetë dhe kalon në avantazh për herë të parë në këtë sfidë Interin. Shpërthen publiku i ?San Siro”-s, sepse tani Interi kryeson 3-2. Vendasit luajnë më mirë dhe i afrohen golit të katërt me Korrean dhe Xhekon që godet shtyllën. Mendon Sançez që të vulosë këtë përmbysje të madhe të Interit, duke shënuar golin e 4-t të vendasve. Zikaltrit marrin tri pikë të arta dhe ngjiten përkohësisht në krye të renditjes së Serisë A.

Itali-Seria A / Java e 36-të

Inter-Empoli 4-2

Romanjoli 40? (aut), Lautaro 45?, 64?, Sançez 90+5/ Pinamonti 5?, Asllani 28?





Lajmet e fundit nga