web counter
LEXO PA REKLAMA!

SHKARKO APP

App Store
Google Play

E fundit!

x

Rekord infektimesh në Gjermani/ Për herë të parë, regjistrohen mbi 200 mijë raste të reja me Covid në 24 orë

27 Janar 2022, 13:00, Lifestyle CNA

Shkalla e infektimeve me Covid 19 në Gjermani ka shënuar një rekord të ri.

Për herë të parë pas dy viteve që nga fillimi i pandemisë, në Gjermani janë regjistruar mbi 200 mijë raste të reja me Covid për 24 orë.

Kjo ka sjellë gjithashtu shkallën e incidencës shtatë-ditore në një nivel të ri prej 1017,4 raste të reja për 100,000 banorë, nga 940,6 një ditë më parë dhe 638,8 saktësisht një javë më parë.

Në tetë shtete federale shkalla e incidencës tani ka tejkaluar 1.000 raste të reja për 100.000 banorë. Berlini aktualisht ka normën më të lartë prej 1.863,2, i ndjekur nga Hamburgu me 1.616,2. Shkalla më e ulët e incidencës aktualisht po regjistrohet në Turingi , e cila ka një vlerë prej 371,8.

Pikërisht dy vjet më parë, më 27 janar 2020, rasti i parë me koronavirus në Gjermani u konfirmua zyrtarisht në Bavari . Që atëherë, më shumë se 9.2 milionë njerëz në mbarë vendin janë infektuar me Covid, ndërsa 117.314 kanë humbur jetën. Deri më tani, rreth 73.7 për qind e popullsisë së Gjermanisë është plotësisht e vaksinuar.

Të mërkurën në Bundestag është diskutuar për vaksinim të detyrueshëm, ku janë vënë në pah të mirat dhe të këqijat e kësaj lëvizje.

Ndërsa shumë deputetë ishin në favor të vaskinimit të detyrueshëm për të gjithë të rriturit, të tjerë kërkuan një “të mesme” ose e hodhën poshtë si opsion.

Ministri i shëndetësisë, Karl Lauterbach bëri thirrje që të merret një vendim sa më shpejt që të jetë e mundur, për të shmangur vonesat e panevojshme. Deputeti i FDP-së, Andreë Ullman, bëri thirrje për bisedime nëse duhet vendosur vaksinimi i detyrueshëm për personat mbi 50 vjeç.

Edhe deputetë të tjerë u shprehën se janë dakort për vendosjen të vaksinimit me detyrim vetëm për të moshuarit.

Kreu i grupit parlamentar të SPD, Dagmar Schmidt dhe ekspertja shëndetësore e të Gjelbërve, Kirsten Kappert-Gonther folën në favor të vaksinimit të detyrueshëm për të gjithë të rriturit që nuk përjashtohen për arsye mjekësore. “Ne kemi nevojë për një shkallë shumë të lartë vaksinimi për të dalë nga pandemia,” tha Schmidt.

Ndërsa nënkryetari i Bundestagut Wolfgang Kubicki e hodhi poshtë propozimin. Ai Vuri në dukje se vende të tjera si Portugalia, Spanja dhe Danimarka kanë arritur norma më të larta imunizimi pa bërë vaksina të detyrueshme.

Partia AfD foli qartë kundër çdo lloj vaksinimi të detyrueshëm. Deri më tani, tre opsione janë në tryezë: vaksinimi i detyrueshëm për të gjithë të rriturit, vaksinimi i detyrueshëm nga mosha 50 vjeç dhe jo vaksinimi i detyrueshëm. Vendimi pritet të merret në mars./ CNA.al





Lajmet e fundit nga