Italia dhe Zvicra luajnë kreun e grupit në distancë, Anglia “vulos” kualifikimin

15 Nëntor 2021, 09:11, Sport CNA

Po luhen ndeshjet e fundit të kualifikueseve të Kupës së Botës, Katar 2022. Deri më tani 7 skuadra (Belgjika, Kroacia, Danimarka, Franca, Gjermania, Serbia dhe Spanja) të kontinentit europian kanë siguruar kualifikimin për në fazën finale të turneut dhe 3 ?biletat? e fundit për në Katar do të vendosen nga ndeshjet e ditës së sotme dhe asaj të nesërme.

Sot do të zhvillojnë ndeshjet e fundit të kësaj fushate eliminatore skuadrat e grupeve C, F dhe I.

Italia dhe Zvicra luftojnë në distancë për vendin e parë në grupin C, vend që të kualifikon direkt në fazën finale të Kupës së Botës. Të dyja skuadrat kanë nga 15 pikë pas 7 ndeshjeve të luajtura (asnjë humbje deri tani), por për momentin vendin e parë e zë Italia, falë golavarazhit më të mirë.

Kampionët në fuqi të Europës duhet të fitojnë patjetër në transfertën e sotme në Belfast përballë Irlandës së Veriut dhe të shpresojnë që Zvicra të mos fitojë ndeshjen që luan në shtëpi përballë Bullgarisë, që të ruajnë vendin e parë në grup.

Nëse të dyja skuadrat fitojnë (ose arrijnë të njëjtin rezultat në sfidat respektive) atëherë është golavarazhi ai, që do të vendosë se kush do të shkojë në Katar 2022 (aktualisht Italia ka një golavarazh më të mirë se Zvicra, +2 gola).

Në grupin F gjithçka është vendosur: Danimarka është kualifikuar për në fazën finale të Botërorit, ndërsa Skocia do të luajë në Play Off. Të dyja skuadrat do të përballen në Skoci në ndeshjen e fundit të kësaj fusha eliminatore.

Danimarka ka fituar të gjitha ndeshjet që ka zhvilluar deri më tani në grup dhe sot kërkon një tjetër sukses, që të bëhet skuadra e vetme që e mbyll me pikë të plota këtë fushatë eliminatore. Austri-Moldavi dhe Izrael-Ishujt Faroe janë dy sfidat e tjera të grupit F.

Anglia kërkon fitoren në transfertën e sotme përballë San Marinos, që të blindojë kreun e grupit I dhe të sigurojë kështu një biletë të Katar 2022. Anglezët kanë 3 pikë më shumë se Polonia dhe sigurojnë kualifikimin edhe me një barazim në sfidën e sotme (nëse polakët fitojnë ndeshjen e tyre).

Polonia, që me shumë mundësi do të luajë në Play Off, do të përballet me Hungarinë në ditën e sotme. Matematika i lejon polakët të besojnë te vendi i parë, por duhet të ndodhë një mrekulli, që kjo gjë të bëhet realitet.

Shqipëria mbyll këtë fushatë eliminatore në shtëpi përballë Andorrës. Një sukses në sfidën e sotme do të blindonte vendin e tretë në grup dhe do të ngjiste skuadrën kuqezi në kuotën e 18 pikëve, si asnjëherë më parë në histori.