Vaksinimi i detyruar nxit imunizime dhe protesta

11 Tetor 2021, 16:57, Lifestyle CNA

Ndërsa numri i përgjithshëm i të infektuarve me COVID-19 në Shtetet e Bashkuara po bie, masa e vaksinimit të detyruar po nxit imunizimin mes disa punonjësve dhe protesta nga disa të tjerë.

Ndërsa 76 për qind e popullsisë së Shteteve të Bashkuara është vaksinuar me të paktën njërën dozë, në vendet e punës ku vaksinimi kundër COVID-19 është i detyrueshëm afatet për kryerjen e tij po afrohen me shpejtësi. Kjo masë hasi në rezistencë tek punonjësit që rrezikojnë të humbasin vendet e punës.

Në distriktin e Los Anxhelosit, sherifi tha se nuk do të zbatojë urdhrin e vaksinës për 18 mijë punonjësit e tij.

?Ka grupe të tëra punonjësish që zgjedhin të largohen nga puna në vend që të vaksinohen. Nuk dua që të humbasim 5 deri 10 për qind të punonjësve brenda natës për shkak të vaksinës?, tha Sherifi i Distriktit të Los Anxhelosit, Alex Villanueva.

Tensionet vijnë ndërsa shkalla ditore e infektimeve me COVID-19 në SHBA ka rënë në rreth 95 mijë raste të reja. Rënia vjen pas kulmit të shtatorit, kur sipas Universitetit Johns Hopkins ishin regjistruar 172 mijë raste në ditë.

Dr. Anthony Fauci, eksperti kryesor i sëmundjeve infektive, tha për rrjetin CNN se është optimist rreth trajektores së pandemisë, por shtoi se ende është herët që të hiqet dorë nga kufizimet pandemike siç është maska.

?Do të doja që rastet të binin nën 10 mijë, e madje edhe më poshtë se kaq. Por shifra prej 95 mijë tregon se jemi në një situatë me një shkallë të lartë të qarkullimit dinamik të virusit në komunitet?, tha ai.

Zyrtarët e shëndetësisë pritet të takohen më vonë këtë muaj për të diskutuar kërkesën e kompanisë Pfizer për miratimin urgjent të vaksinës për fëmijët nga 5 deri 11 vjeç. Pfizer ka propozuar që fëmijët të vaksinohen me një të tretën e dozës për të rriturit.

Ish-kreu i Administratës së Ushqimit dhe Barnave, Scott Bottlied, anëtar i bordit të kompanisë Pfizer, tha për rrjetin CBS se mund të duhen vite para se vaksinimi i fëmijëve në shkolla të bëhet i detyrueshëm.

?Grupmoshat 12 deri 17 vjeç mund të jenë disa vite larg, ndoshta edhe më gjatë. Ata nga 5 deri 11 vjeç edhe më larg. Deri atëherë do të ketë më shumë përvojë?, tha ai.

Ndërkohë, administrata Biden ndau 1 miliardë dollarë për blerjen e miliona testeve të shpejta kundër COVID-19 që mund të bëhen në shtëpi, pas raporteve për mungesë të pajisjeve të testimit në të gjithë vendin. Deri në dhjetor, Shtëpia e Bardhë thotë se do të sigurojë rreth 200 milionë teste në muaj./voa