Skënderbeu blindon dhe mbrotjen, tani në merkato për një sulmues

30 Qershor 2021, 14:25, Sport CNA

Pas arritjes së akordit edhe për një sezon tjetër me Zguron, duket se korçarët kanë blinduar prapavijën dhe janë më se të kompletuar në këtë repart. Edhe pse në radhët e Skënderbeut pritet të ketë të tjera afrime, duket se pjesa më e madhe e skuadrës ka marrë formë. Në kushte të tilla, porta është e kompletuar me Ruçin dhe Rexhepin që do të kthehet sërish pjesë e Skënderbeut pas mbylljes së aventurës europiane me Shkëndijën. Për të vijuar më tej edhe me prapavijën, ku të gjithë elementët e sezonit të kaluar janë të konfirmuar për të qenë pjesë e Skënderbeut edhe për këtë sezon.

Krahët me Meksin dhe Zguron japin garancinë e duhur për Memellin, ndërsa qendra sërish do të vijojë të qëndrojë ?pronë? e Sadriut dhe Vitijas. Edhe mesi i fushës pavarësisht disa largimeve që duket se kanë bërë të krijohet njëfarë grope, duket se janë mbushur disi me afrimet e tjera. Sigurisht që firmosja me Vrapin dhe Rosën duket se ka zëvendësuar largimet e Rrapajt e Taipit dhe dilemën deri tani të Marës, që në rast se dhe ky i fundit bindet për të qëndruar sërish në Korçë do të kompletonte plotësisht edhe këtë repart për Memellin.

Tashmë duket se i vetmi repart ku Skënderbeu do të kërkojë përforcime është sulmi. Berisha, Pusi dhe Mensah janë lojtarët që do të vijojnë të mbajnë peshën e këtij sezoni por që Memelli dhe Takaj duket se do të kërkojnë që të kenë një element më shumë në këtë pozicion. Dukshëm, mungesa e golave sidomos në pjesën e parë të sezonit të kaluar kanë bërë që të ndjehet domosdoshmëria për afrime të tjera.

Pikërisht nga sa referojnë burimet pranë klubit, presidenti Takaj është duke punuar për një afrim në repartin e sulmit. Ende nuk ka një emër të zgjedhur nga Takaj, por sikundër flitet, do të jetë një lojtar, i cili premton gola dhe mund të luajë fare mirë përkrah Mensahut dhe Berishës. Në kushte të tilla, merkatoja e Skënderbeut qëndron ende e hapur deri në momentet e fundit, por që dukshëm do të jetë e fokusuar kryesisht te gjetja e një sulmuesi apo edhe të një tjetër afrimi në mesfushë në mënyrë që t?i japë sa më shumë elementë trajnerit për të zgjedhur formacionin, por edhe për të mos pasur dhimbje koke gjatë sezonit të ardhshëm.