Cungu: Ky është kampionati më i dobët që mbaj mend nga cilësia

20 Maj 2021, 08:00, Sport CNA

Armando Cungu, trajner me shumë përvojë në Superiore e tashmë në stolin e përfaqësueses U19 të Shqipërisë, mendon se kampionati aktual, është më i dobëti nga cilësia, pasi nuk është rritur niveli i skuadrave të dobëta, por ka rënë ai i ekipeve të forta. Duke folur për ?Sporti nga Bajraktari? ai ka shpjeguar këndvështrimin e tij edhe për betejën për titull, duke theksuar se për shkodranët rrallëherë do të vinte një mundësi si ajo e këtij edicioni ku kishin patur një diferencë të thellë me ndjekësit që nuk kishin ditur ta administronin.

?Përderisa kanë mbetur dy javë, mendoj se pothuajse 90% është vendimtare për Vllazninë e Partizanin e më saktë për titullin kampion, duke pasur parasysh që edhe Laçi e Teuta luajnë ndeshje mes tyre. Gjasat janë që të përfundojë këtë javë e të njohim më në fund fituesin e kampionatit.

Mendoj se është ndeshje e hapur, edhe pse luhet në Tiranë. Kampionati ka treguar se nuk ka ndeshje të forta e të dobëta, niveli ka aty-aty, e kanë vendosur shpesh episodet. Vllaznia duhet të luajë e çliruar se objektivin e arriti, pjesëmarrjen në Kupat e Europës dhe kjo e çliron shumë në aspektin psikologjik që të luajë futboll pa stres që të marrë maksimumin.

Ekipi më i mirë? Unë dua të jem i sinqerte duhet të flas si profesionist, zemra më ka thirrur Vllaznia e do bëj tifo për të deri në ditën e fundit. Por me logjikë futbolli e kam thënë që kam qenë i bindur për Laçin e Partizanin, dy ekipe që spikatin sa i përket lojës e kontingjentit. Pavarësisht se Vllaznia kishte mundësitë të shpallej kampion. Ka qenë shumë afër, vështirë se mund të jetë më në gjysmë të kampionatit me një diferencë të tillë. Por Vllaznia në fund të fundit duhet të nxjerrë mësime nga këto situata.

Fjalët e Laskës? Nuk janë komentet për mua që t?i bëj. Por nuk mendoj se është normale, mund të jetë edhe kurth për Teutën, edhe në aspektin psikologjik ndodhin deklarata të tilla. Jo ajo që thuhet gjithmonë është reale, ka edhe nënkuptime. Sidoqoftë, nuk është normale, mund të jetë formë presioni.

Kampionati më i bukur? Unë nuk them se është më i bukuri, nuk e them kurrë. E kam dëgjuar që e thonë. Unë them se sa i përket cilësisë, është më i dobëti që kam parë si sportist e trajner. Nuk ka pasur ekipe të mëdha e të vogla, nuk ka pasur diferencë në lojë e cilësi. Ekipet e madha kanë patur rënie të cilësisë e nivelit e kanë rënë në nivelin e ekipeve të tjera. Kjo ka qenë arsyeja e kësaj konkurrence. Konkurrenca nuk do të thotë gjithmonë cilësi për mendimin tim?, tha Cungu.