Çfarë ndodhi me votat e demokratëve?

26 Prill 2021, 07:41, Politikë CNA

Ditën e djeshme u zhvillua procesi i votimit në gjithë Shqipërinë.

Pati një proces model në gjithë vendin, pati edhe një fushatë e cila javën e fundit, vend-vende kishte edhe tensione me tentativa denoncimesh për blerje votash, por në finale është rezultati që del nga kutitë ai që i thotë të gjitha.

Sipas të gjitha publikimeve, PD duket se po fiton vetëm në disa qarqe të veriut dhe votat e fitores së Lulzim Bashës mungojnë në kutitë e votimit. Duket tashmë në trend se Rama po fiton, Lulzim Basha po humbet.

Basha po humbet pasi shpalli një fitore dhe votat e demokratëve nuk kanë mundur të përmbysin ato të socialistëve pasi Lulzim Basha nuk ka arritur të ngrerë PD përtej shifrave 38-40% dhe një rënie drastike e LSI e ka bërë të pamundur skemën që të dy palët të dala të ndara në koalicione më vetë të sjellin fitoren për PD duke marrë me tej në koalicion edhe LSI.

Votat mungojnë në kuti dhe përgjegjësi në një fushatë elektorale të një force politike është gjithmonë kryetari. Në një vend perëndimor, tashmë humbësi do kishte uruar fituesin dhe gjithçka do të ishte e qartë, por mesa duket votat e munguara te demokratëve nuk e kanë bërë që Basha të japë dorëheqjen, ashtu si nuk u dorëhoq në vitin 2017.

Tashmë ngelet të presim çfarë do të ndodhë brenda opozitës, megjithëse ky nuk është halli dhe nuk duhet të jetë problem i opozitarëve.

Lulzim Basha tashmë nuk duhet të diskutohet, ai duhet të japë dorëheqjen dhe PD duhet të hyjë në proces thelbësor reformimi për të zgjidhur njëherë e mirë se çfarë po ndodh me votat e demokratëve, të cilat Lulzim Basha i rudhi keqazi në 2017 dhe tentoi t?i rikuperonte duke goditur LSI për të pasur një ngritje të madhe elektorale në këto zgjedhje dhe për të shpallur fitoren e cila në fakt është thjesht dhe vetëm në humbje.

Bashën nuk e lë Rama të largohet, ndërsa pritet ta ftojë në qeveri sepse Ramës i duhet patjetër, që të ketë shans për mandat të katërt.

Por nëse nuk e shpëton Rama, Basha duhet të largohet sepse edhe tek njësia numër 10 në Tiranë, ka marrë më pak vota individuale se plot kandidatë të tjerë. Pra Lulzim Basha do të dalë shumë dobët edhe personalisht./CNA.al