Pas ultimatumit të SHBA Meta nuk humb kohë/ Zgjedh anëtarin e gjashtë për Gjykatën Kushtetuese, zbardhet emri

23 Dhjetor 2020, 16:56, Aktualitet CNA

Presidenti Ilir Meta nuk ka humbur kohë dhe ka zgjedhur anëtarin e gjashtë për në Gjykatën Kushtetuese.

Sot KED dërgoi në Presidencë listën me dy emra, Përparim Kalo dhe Aleksandër Toma.

Kreu i shtetit pasi u njoh me vlerësimin e KED vendosi që të zgjedh Përparim Kalon si anëtar për në Kushtetuese, i cili u rendit i pari nga KED me 90.29 pikë.

Pas ultimatumit të SHBA, palët vepruan me emergjencë, por Kuvendi sot mbylli punimet për këtë vit, ku vetë kreu i Kuvendit deklaroi se seanca do të rinisë në 18 janar 2021. Tashmë që Meta zgjodhi anëtarin e radhës pritet të shihet nëse Kuvendi do të mblidhet në seancë të jashtëzakonshme për të miratuar emrin e Përparim Kalos apo do e lërë për vitin e ardhshëm.

Njoftimi i plotë i Presidencës:

Presidenti i Republikës, Sh.T.Z Ilir Meta ka administruar sot nga Këshilli i Emërimeve në Drejtësi, Listën Përfundimtare të Renditjes së Kandidatëve të lejuar për kandidim dhe Raportin e Arsyetuar të Renditjes së tyre për plotësimin e vendit vakant në Gjykatën Kushtetuese (vakancë e parakohshme).

Sipas praktikës dokumentare të dërguar, Këshilli i Emërimeve në Drejtësi me vendimin nr. 59, datë 23.12.2020, ka vendosur miratimin e listës përfundimtare të renditjes së kandidatëve për gjyqtar në Gjykatën Kushtetuese, në vendin vakant, vakancë e parakohshme, e shpallur nga Presidenti i Republikës në datën 07.02.2018, e rishpallur në datën 27.09.2019 dhe e rishpallur për herë të tretë në datën 24.09.2020, me renditjen e kandidatëve si më poshtë:

1) Përparim Kalo 90.29 Pikë

2) Aleksandër Toma 75.57 Pikë

Presidenti Meta, pasi u njoh dhe vlerësoi praktikën dokumentare të vendimmarrjes, vlerësimit dhe të renditjes së kandidatëve të miratuara nga Këshilli i Emërimeve në Drejtësi; si dhe duke vlerësuar njëkohësisht nevojën jetike që ka vendi për plotësimin dhe funksionimin sa më parë të Gjykatës Kushtetuese, në përfundim të shqyrtimit, në mbështetje të neneve 93, 125 pika 1, 127 pika 3, 129, 149/d pika 1, të Kushtetutës së Republikës së Shqipërisë, neneve 7, 7/a pika 4, 7/b, 7/dh pika 2, të ligjit nr. 8577, datë 10.02.2000 ?Për organizimin dhe funksionimin e Gjykatës Kushtetuese të Republikës së Shqipërisë?, të ndryshuar, pa asnjë vonesë, me Dekretin nr. 11882, datë 23.12.2020, ka vendosur që:

– Zoti Përparim Kalo emërohet gjyqtar i Gjykatës Kushtetuese./CNA.al