web counter
LEXO PA REKLAMA!

SHKARKO APP

App Store
Google Play

A po përgatitet Basha të delegjitimojë komisionin Ruli-Nishani?

26 Tetor 2020, 17:06, Politikë CNA

Kjo është një foto e komisionit të përzgjedhjes së kandidatëve të PD për deputetë, i cili është paraqitur nga Lulzim Basha si një risi, jo vetëm për Shqipërinë, por për gjithë Europën demokratike. Ata pozojnë të qeshur dhe me sa duket sapo i kanë dhënë dorën e fundit raportit të shumëdiskutuar, që ka skualifikuar disa prej emrave të njohur si ish-deputetë e zyrtarë të tjerë të lartë të kësaj partie.

Por raporti i tyre nuk është pritur mirë nga të mbeturit në klasë dhe pothuajse të gjithë kanë lëshuar deklarata të rënda për 5-çen e komisionit, duke theksuar se nuk e njohin fare atë dhe se kanë punë vetëm me Lulzim Bashën.

Vetë kryetari i PD-së, i ndodhur në siklet, ka deklaruar sot se ai është thjesht një raport, por jo vendim i formës së prerë, duke lënë të kuptojë se disa prej emrave mund të rikthehen në listë.

Nëse kjo do të ndodhë, i bie që vetë Basha të shkelë me të dyja këmbët udhëzimin e firmosur prej atij vetë dhe ta deligjitimojë plotësisht procesin e trumbetuar fort si një praktikë moderne dhe bashkëkohore.

Por përtej kësaj, ajo do të ishte një fyerje dhe poshtërim për vetë komisionin, i cili ishte mburrur për autonomi të plotë në punën e vet seleksionuese. Dhe me atë rast, Genc Ruli, Bujar Nishani, Mark Marku, Besnik Mustafaj dhe Endriketa Papa duhet të përgatiten të dalin një foto tjetër, ku të pozojnë të mërzitur, se kjo pamje gazmore nuk do të kishte më asnjë kuptim.

Ose duhet të kërkojnë falje, siç u ka propozuar ish-deputeti i Shkodrës, Romeo Gurakuqi./ CNA.al





Lajmet e fundit nga