“Gara nuk do të jetë e barabartë”/ Shehi: Kukësi s’dorzohet, më tremb vetëm qeveria

16 Maj 2020, 07:05, Sport CNA

Ethet e kampionatit dhe të garës për tit ull mes Kukësit e Tiranës duket se kanë nisur në distancë ende pa rifilluar gara. Nga njëra anë ishte Kristi Vangjeli i Tiranës, i cili u shpreh se Orges Shehi e di se Tirana është kampione e padiskutueshme. Tashmë është trajneri i Kukësit, i cili në një intervistë të dhënë për ?Panorama Sport?, i jep një përgjigje mbrojtësit korçar të bardhebluve.

Ai flet gjithashtu për situatën në skuadër, problematikën me lojtarët dhe atë që i druhet. Shehi e pranon se i trembet një vendimi të qeverisë për mosrifillimin e aktiviteteve sportive, paçka se FSHF zyrtarizoi datën 3 qershor. Trajneri sqaron se futbollistët kanë respektuar programin dhe nuk kanë shtuar në peshë. Ai thekson se do ta kërkojë titullin deri në fund.

Orges, FSHF vendosi që kampionati të rifillojë më 3 qershor. Është e mjaftueshme për ju të keni dy javë në dispozicion me ekipin?

Koha deri me 3 qershor është maksimumi i mundshëm. Megjithatë, mendoj që Ministria e Shëndetësisë duhet të na jepte disa ditë më shpejt lejen për t?u stërvitur. Nga data 3 qershor deri në fund, janë 15 ndeshje për 2 muaj, kampionat dhe Kupë bashkë nëse shkojmë deri në finale. Prandaj, them që është limiti, por të ishim lejuar të stërviteshin më herët mund të niste kampionati në fund të majit. Pra, kaq është vonë, pasi ka shumë ndeshje dhe intensitet, duke menduar që lojtarët kanë më tepër se dy muaj pa u stërvitur.

Qeveria nuk i ka kthyer ende një përgjigje zyrtare FSHF-së për lejimin e aktiviteteve sportive. I druheni një vendimi që nuk ju shkon përshtat?

Personalisht i druhem, sepse po shoh që sikur qeveria nuk është shumë disponibël për të na lejuar për t?u stërvitur dhe për të filluar aktivitetin. Derisa të dalë një vendim, ne jemi sy e veshë për lajmin. Qeveria duhet të vendosë sa më shpejt. Pra, të na thotë nëse do të vazhdojë apo do të mbyllet kampionati.

Mendoni që pas rifillimit do të ketë një garë të barabartë apo keni rezerva për këtë pjesë?

Gara sigurisht që nuk është e barabartë për një fakt fare të thjeshtë. Ka skuadra që i kanë pasur lojtarët këtu, kurse ne, për shembull, kemi pasur 7 lojtarë që i janë nënshtruar karantinës dhe Limajn që ende s?ka ardhur. Pra, jemi në kushte aspak të barabarta.

Cilat janë synimet tuaja në dy muajt e verës që si kurrë më parë do të luhet kampionati dhe Kupa e Shqipërisë?

Synimi aktual dhe kryesor imi është që të sjell lojtarët sa më në formë pas gjithë kësaj vështirësie. Pastaj, kur të fillojmë kampionatin, synimet e mia janë gjithmonë për të arritur maksimumin. Jam person që nuk dorëzohem kollaj. Bashkë me çunat, me zor presim fillimin për të bërë maksimumin, por më shumë se maksimumi.