Presidenti gjerman thirrje qytetarëve/ Demokracia ka nevojë për ne

24 Dhjetor 2019, 08:51, Kosova & Bota CNA

Në sfondin e pasigurisë, fyerjeve, antisemitizmit dhe urrejtjes në jetën e përditshme dhe në internet, presidneti i Gjermanisë Frank-Walter Steinmeier u bën thirrje qytetarëve për më shumë angazhim për demokracinë.

Në fjalën e tij dretjuar popullit me rastin e Krishtlindjes presidenti i Gjermanisë Steinmeier fokusohet vetëm në gjendjen e politikës së brendshme dhe shoqërore në Gjermani. Më 2018 ai në fjalimin e tij iu referua edhe vendeve të tjera ndër të tjera trazirave në Francë, zhvillimeve politike në SHBA, shqetësimit për daljen e Britanisë së Madhe nga BE. Kësaj here ai e përqendron fjalimin e tij tek Gjermania dhe vetëm tek Gjermania. Për herë të parë ai shprehimsiht përmend urrejtjen me sfond antisemitizmin në vend.

Lidhur me këtë presidenti kujton një ndër çastet më dramatike të vitit në Gjermani, atentatin ndaj një sinangoge në Halle. Një i pandehur ekstremist më 9 tetor u përpoq të hyjë në sinagogën, ku po kremtohej dita e festës hebraike Jom Kippur me mbi 50 pjesëmarrës. Ai dështoi vetëm për shkak të portës së drunjtë të përforcuar masivisht. “Është një mrekulli, që porta rezistoi dhe që prej tentativës për sulmin brutal me motiv antisemitzmin nuk pati më shumë viktima – më shumë se dy viktima, që dorasi arriti të vrasë”, thotë Steinmeier.

Porta në Halle

Ditën pas atentatit presidenti qendroi vet, dukshëm i tronditur, përpara kësaj porte të drunjtë duke u shprehur ngushëllimet pjestarëve të komunietit dhe duke nderuar kujtimin e dy të vrarëve. Portën e drunjtë, që shpëtoi jetë dhe që do të kthehet në një memorial, ai e përdor si krahasim në fjalimin e tij: “A jemi të fortë dhe mund të mbrohemi? Qendrojmë ne sa duhet me njeri-tjetrin dhe për njeri-tjetrin?” Këto pyetje i drejtohen të gjithë njerëzve në Gjermani. Para pak ditësh Steinmeier vizitoi bashkësinë hebreje në Berlin dhe theksoi atje përgjegjësinë e të gjithë qytetarëve për t’u angazhuar kundër urrejtjes ndaj hebrejve.

Në këtë mënyrë presidenti apelon me këmbëngulje për veprimin demokratik që përbën boshtin e fjalës së tij me rastin e Krishtlindjes, e cila tradicionalisht transmetohet në mbrëmje në ditën e Krishtlindjes në televizionet publike gjermane.

T’i bëjmë ballë racizmit

Steinmeier nxjerr në pah temat, për të cilat bisedohet në debate të nxehta. Zgjedhjet dhe rezultatet e zgjedhjeve, klima dhe ndryshimi i klimës, e ardhmja e Europës, niveli i ribashkimit pas 30 vjetësh të rënies së Murit të Berlinit. “Këto janë kohë intensive politike, në të cilat jetojmë ne – dhe sipas mendimit tim as që mund të bëhet fjalë se ka pak liri mendimi. Përkundrazi: kaq shumë diskurs nuk ka pasur asnjëherë më parë.”

Është e rëndësishme pjesëmarrja, thekson Steinmeier duke përmendur shembuj: Nëse ka fyerje në publik duhet të mbështetet më i dobëti – duhet ngritur zëri për t’u kundërvënë kur ofendohen pakicat, kur në oborrin e shkollës apo në lokal lëshohen shprehje raciste ? duhet kundërshtuar racizmi dhe urrejtja në “rrjetet sociale”. Po ashtu presidneti vlerëson angazhimin vullnetar dhe unitetin mes fqinjëve, falë policeve dhe policëve, punonjësve në fushën e kujdestarisë dhe infermierëve e bashkëpunëtorëve nëpër spitale.

“Ne na duhet demokracia”

“Ju jeni të gjithë pjesë e demokracisë”, thekson ai duke tërhequr vëmendjen. Duhet pra angazhim politik, në demonstrata, në politikën lokale apo në punën partiake. “Ju të gjithë keni një copëz Gjermani në dorën tuaj.” Kjo na bashkon të gjithëve pa dallim. Sipas Steinmeier, orientimi mund të jetë duke kujtuar “guximin e pashembullt” të njerëzve në Gjermaninë Lindore asokohe, që më 1989, para 30 vjetësh rrëzuan Murin e Berlinit dhe mundësuan bashkimin. “Ne kemi nevojë për demokracinë – por besoj, ndërkohë në radhë të parë demokrcia ka nevojë për ne.” Synohet besim dhe aftësi veprimi, arsye, mirësjellje dhe solidaritet. Sepse, tërheq vëmendjen presidenti, bashkimi, liria dhe demokracia nuk janë të vetëkuptueshme.

Në mbyllje të fjalës së tij ai për herë të parë në një fjalim të tillë citon tri fjalë biblike mbi historinë e Krishtlindjes: “Mos kini frikë!”. Në këtë mënyrë Steinmeier u uron të gjithëve guxim e besim për vitin e ardhshëm./ DW