E fundit!

23:00 Aktualitet

Zgjedhja e ekipit drejtues të PD-së/ Vijon numërimi i votave në selinë blu

Vijon procesi i numërimit të votave për zgjedhjen e strukt...

Kuvendi votim në shkelje flagrante të kushtetutës/ Ruçi shpall anëtaret e reja të Gjykatës pa bërë betimin tek Presidenti

11 Nëntor 2019, 14:52, Politikë CNA

Elsa Toska e Fjona Papajorgji u votuan sot në Kuvend me shumicë votash si anëtare të Gjykatës Kushtetuese.

Haptazi në shkelje të kushtetutës, deputetët u vunë të votonin vetëm nga një kandidaturë.

Me një votim shumë të ngjashem me atë të ligjeve të Reformës në Drejtësi, deputetët u vunë përpara faktit të kryer dhe në kundërshtim me parashikimet kushtetuese, kishin mundësi të zgjidhnin vetëm një anëtar për secilin vend. Me një procedurë të shpikur nga halli e jo nga kushtetuta, 105 deputetë praktikisht nuk zgjodhën, por thjesht u shprehën pro plotësimit të vendeve bosh nga zonjat Toska e Papajorgji.

Kryeparlamentari Ruçi përpara nisjes së “votimit”, sqaroi shqiptarët se Këshilli i Legjislacionit e ka konsideruar Kushtetuese procedurën e ndjekur, ndaj edhe vijoi me procesin e votimit. Pra megjithese Komisioni i ligjeve i kish përcjellë seancës dy lista me nga 3 emra, Gramoz Ruçi u vuri përpara deputetëve nga 1 emër për çdo karrike kushtetuese.

Në fakt nuk u kuptua nëse interpretimin Ruçit ja kish bërë KED apo Këshilli i Legjislacionit, por u dëgjua qartë që Ruçi i kish kërkuar KED ti shpjegonte me shkresë atë që gjithë shqiptarët e dinë nga njoftimet zyrtare të institucioneve, të njoftuara publikisht në media. Ruçit i qenkësh dashur shkresë nga KED që ti shpjegonte që Besnik Muçi dhe Arta Vorpsi na qenkeshin emëruar ndërkohë si anëtare të Gjykatës!

?Deputetët janë vënë në dijeni të qëndrimit të Presidentit, lidhur me këtë i jam drejtuar KED-së, e cila i është përgjigjur kërkesës me arsyetimet përkatëse, dhe konkludon se kandidatja e parë automatikisht është e zgjedhur anëtare. Duke patur parasysh që kishte vlerësime politike dhe proceduariale i jam drejtuar këshillit legjislacionit që është i vetmi mekanizëm që ka Kuvendi, që jep mendimin për kushtetuetshëmërinë. Këshilli ka konkluduar se duke parë propozimet e KED etj, dhe procedurën që do të votojmë ka arritur në konkluzionin që është tërësisht kushtetuese.

Në listën e KED ishin renditur: Arta Vorpsi, Elsa Toska, Besnik Muci, ky i fundit i dekretuar nga Presidenti.

Nga lista e paraqitur nga KED, Arta Vorpsi rezulton të jetë shpallur për vendin vakant, pas plotësimit të afatit 30 ditor, dhe në mungesë të ushtrimit të dekretimit, është botuar në fletore zyrtare. Kandidati i tretë gjithashtu i botuar në fletore zyrtare, me dekret të presidentit.? tha Ruci.

I kthyer mbrapsh filmi ose teatri i emërimeve në Gjykatën Kushtetuese rezulton se KED në dukje kish përcjellë lista me nga 3 emra, por duke qenë se listat ishin identike KED praktikisht kish zgjedhur me kohë, anëtarët e Gjykatës Kushtetuese.

Kuvendi vetëm u mblodh për të noteruar vendimin e marrë në KED.

Ra në sy që në fund të votimit Ruçi deklaroi:

?105 vota pro, 2 kundër, 0 abstenim. Nuk kanë votuar 2 deputetë. Elsa Toska shpallet fituese për anëtare të Gjykatës Kushtetuese pas votimit të Kuvendit.?

Kandidatja tjetër në listë Fjona Papajorgji, u votua me 105 pro, 3 kundër, 8 abstenim, ndërsa 2 deputetë nuk morën pjesë në votim. edhe ajo u shpall fituese per anetare e gjykates Kushtetuese.

Duke perdorur shprehjen “shpallet fituese” me sa duket Ruçi deklaroi paraprakisht që zonjat nuk kanë nevojë as që të bëjnë betimin tek Presidenti. KED mbase ja ka shpjeguar edhe këtë në letrën e vet drejtuar Kryetarit të Kuvendit.

Zonjat Toska dhe Papajorgji, u shpallën që sot anëtare të Gjykatës Kushtetuese. Meta mund të vazhdojë vizitat jashtë shtetit.