E fundit!

20:58 Aktualitet

FOTOLAJM/ Pankartat "pikante" në protestën e 46 kundër qeverisë

Vijon protesta e 46 para Kryeministrisë. Protestuesit vijo...

Denoncimi-Santiago Malko, vrasës me pagesë i Ervis Martinajt/ Bossi i lojërave të fatit i shpëtoi gjithnjë drejtësisë

30 Shtator 2019, 18:04, Denoncim CNA

Santiago Malko, ish-polici që u vra në zonën e Xhamllikut, më 27 gusht 2019, është një nga emrat që njihet për miqësinë e tij me bossin e lojërave të fatit, Ervis Martinaj. Pas shkrimeve që Dosja.al ka botuar përgjatë ditëve të fundit, për “klanin Duka”, dhe përplasjen mes bandave në Tiranë, në redaksinë tonë kanë vërshuar denoncimet. Denoncimet kanë të njëjtin emër në qendër të tyre, biznesmenin Ervis Martinaj. Denoncuesë anonimë akuzojnë Martinajn për një sërë ngjarjesh ku ai ka qenë i përfshirë. Që nga vrasja e bankierit Artan Santo, e deri tek vrasja e Elvis Doçi, emri kryesor i akuzuesve është Martinaj.

Dosja.al në respekt të paanshmërisë dhe transparencës ndaj publikut, në një kohë kur përplasja mes bandave, nga rruga është zhvendosur në media, kur njëra palë lobon për goditjen e një klani tjetër, ndjen detyrimin për të sjellë tek publiku, edhe këtë qendrim. Vëmë në dukje se denoncuesi në fjalë posedon edhe fotografi dhe të dhëna tejet të afërta për Martinajn.

Denoncimi i plotë

Të dhëna mbi situatën e përfolur kohët e fundit. Fenomeni Santiago Malko dhe kush është urdhëruesi i tij.

I dyshuar si i përfshirë në një sërë ngjarjesh kriminale por gjithmonë i lirë me të njëjtin justifikim, mungesë provash. Bëhet fjalë për Ervis Martinaj, i njohur si një person i rrezikshëm në Tiranë, i akuzuar për vrasje dhe i dyshuar për disa ngjarje të rënda.

Emri i Ervis Martinajt u lakua për vrasjen e bankierit Artan Santo. Gjatë kontrollit në magazinën e tij në Fushë-kuqe u gjetën dy skafandra të ngjashme me ato që përdoren vrasësit e bankierit. Në fundin e vitit 2013 Martinaj ishte personi i dyshuar për vrasjen e shtetasit Elvis Doçi, një sipërmarrës lojërash fati.

Doçi i ka shitur Martinajt një numër të konsiderueshëm makinash lojëra fati të cilat ishin të palicensuara. Por vetëm pak javë pasi Martinaj kishte marrë makinat e lojrave të fatit, Ministri Tahiri deklaroi nisjen e operacionit ?Fundi i Marrëzisë? për të goditur bizneset e paligjshme të lojërave të fatit.

Ndër operacionet e marra nga policia ishte dhe bllokimi i 400 makinetave të Ervis Martinajt, çka solli përplasjet mes Ervis Martinajt dhe Elvis Doçit.

Martinaj ka pretenduar se Doçi për shkak të lidhjeve të afërta me Saimir Tahirin ka qenë në dijeni të operacionit dhe i ka shitur makinetat pak para se policia të niste operacionin për bllokimin e tyre. Martinaj i ka kërkuar Doçit kthimin e parave që i kishte dhënë për blerjen e makinerive, por diçka e tillë u refuzua nga Elvis Doçi dhe më pas u fol për një përplasje fizike ku Ervis Martinaj mori plagë të rënda.

Pas këtij sherri, më 25 tetor të vitit 2013 në zonën e Komunës së Parisit, vritet në një atentat, Elvis Doçi.

Dyshimet u ngritën mbi Ervis Martinajn por edhe sot pas 6 vitesh, ngjarja ka mbetur pa autor. Ervis Martinaj do të rikthehej sërish në qendër të kronikës së zezë, si i përfshirë drejtpërdrejt në vrasjen e Enton Nikës, ngjarje e ndodhur në parkingun e një lokali në zonën e Linzës, e filmuar nga kamerat e sigurisë. Edhe në këtë rast, Ervis Martinaj ia hodhi me një dënim minimal me 1.5 vite burg. Emri i Martinaj përmendet në gjyqin e Shullazit. Sipas deklaratave tëYlvi Beqajt në prokurori, Ervis Martinaj i ofroi 7 milion euro biznesmenit që akuzon Shullazin për gjobëvënie.

Kur nuk arriti ta bindte me para, Martinaj e ka kërcënuar me vrasje. Emri i Martinajt u përmend dhe në rastin e Viktor Skejës, ish-drejtor i CEZ por si në çdo rast u fol për mungesë të provave. Pjesë e një tjetër ngjarje kriminale në lokalin Solomon ishte sërish Ervis Martinaj, ku mbeti i vrarë Fabiol Gaxha dhe i plagosur Martinaj.

Sërish del i pafajshëm për mungesë provash. Emri i Martinajt u përmend edhe pse jo mediatikisht në një konflikt me Samir Manen, konflikt që u mbulua nga policia dhe nga mediat. Së fundmi, në qendër të kronikës së zezë është vënë vrasja e Santiago Malkos. Malko punonte për Ervis Martinaj si vrasës me pagesë.

Malko ishte i përfshirë në një sherr me vëllezërit Lashi në vitin 2016. Malko ka qenë i përfshirë dhe në ngjarjen e 4 tetorit 2018 ku ndodhi vrasja e Fabian Gaxhës. Malko dyshohet dhe si personi që ekzekutoi Elio Bendon me urdhër të Ervis Martinajt. Edhe pse emri i Ervis Martinajt prej vitesh qarkullon i përfshire në ngjarje kriminale, policia dhe prokuroria në asnjë rast nuk ka zbardhur ngjarjen duke i ofruar mbrojtje një personi që haptasi njihet si person i rrezikshëm./Dosja.al