Thellohet skandali me dosjen 184/ Klodjan Braho shpëtoi bandën e vjedhjes së votave

26 Gusht 2019, 10:40, Kronika CNA

Në errësirë të plotë në muajin korrik, pak kohë para pushimeve vjetore të sistemit të drejtësisë, Prokuroria e Krimeve të Rënda transferoi në Dibër një dosje tejet të përfolur siç është “Dosja 184”.

Gjithçka u bë pa zhurmë dhe për dosjen e manipulimit të dyshuar të votave, ku përfshiheshin zyrtarë të lartë të Partisë Socialiste, madje edhe kryeministri Edi Rama u vendos që të shkatërrohej.

Prokurori i çështjes Klodjan Braho pas tre vitesh që dosja ka qëndruar tek Krimet e Rënda, shpalli moskopetencën për hetimin e mëtejshëm të dosjes me numër 184/2016 me objekt manipulimin e dyshuar të votave gjatë zgjedhjeve të pjesshme vendore të 11 shtatorit 2016 në bashkinë e Dibrës.

CNA.al ka kontaktuar me prokurorin Klodjan Braho, i cili është përzgjedhur edhe në Strukturën e Posaçme Antikorrupsion.

Por, Braho, pas këtij skandali ka heshtur duke mos u përgjigjur, por duke e thelluar më tej krimin elektoral që dyshohet të ketë ndodhur zgjedhjet e shtatorit të vitit 2016 në Dibër.

Të gjitha dyshimet janë se dosja 184 u dërgua në Dibër për të shpëtuar bandën e vjedhjes së votave, ku janë të përfshirë ish Ministri i Transportit, Damian Gjiknuri dhe disa zyrtarë të tjerë të lartë të Partisë Socialiste, përfshirë këtu edhe drejtues policie.

Por, prokurori i skandalit Klodjan Braho, dyshohet se ka pasur për qëllim mbylljen e dosjes 184, e cila implikon të paktën një ish Ministër, një ish deputet, tashmë kryebashkiak si dhe një tjetër deputet socialist së bashku me disa drejtorë të lartë dhe persona me precendentë penalë.

Dosja 184, e destinuar për SPAK, duket se është dërguar drejt shkatërrimit me ndërgjegjje të plotë.

Prokurori Klodjan Braho, i cili është përzgjedhur për të qenë pjesë e SPAK-ut, vendosi që ta transferonte këtë dosje në Dibër, ndërsa SPAK është më pranë formimit se kurrë.

Për SPAK-un, nuk ka rëndësi nëse bëhet fjalë për grup të strukturual apo kriminal si dhe nuk ka rëndësi se kush i shkel është subjekti që ka shkelur rregullat, kryeministri, ministrat, deputetë, drejtorë apo kushdo qoftë.

Sipas Ligjit Nr. 95/2016 për SPAK, në duart e prokurorëve të posaçëm të dorëzohen të gjitha dosjet që kanë të bëjnë me korrupsionin e zyrtarëve të lartë dhe ato për krimin e organizuar. Prokurorët e SPAK mund të hetojnë që nga Presidenti, Kryeministri, ministri, deputetët e deri tek drejtuesit dhe zyrtarët e lartë të institucioneve të tjera në varësi të Qeverisë ose jo.

Zyrtarët e aministuar nga prokurori Klodjan Braho

Tabloidi gjerman “Bild” ka publikuar më herët disa audio-përgjime të nga dosja hetimore “184”.

Një nga personazhet kryesore të audio-përgjimeve ishte Imer Lala, babai i deputetes Reme Lala. Në audio-përgjime ai flet me ish-ministrin e Infrastrukturës dhe Energjetikës, Damian Gjiknuri, me anëtarin e Komisionit Sigurisë Xhemal Qefalia, dhe deputetin Ulsi Manja.

Nga përgjimet u zbulua angazhimi i zyrtarëve të ndryshëm të policisë së shtetit, të cilë synon ndalimin e mbështetësive të PD në opozitë për të udhëtuar nga Kamza për në Dibër, për të marrë pjesë në zgjedhjet e 11 shtatorit 2016.

Gjithashtu në përgjime, doli se si ish-ministri Damian Gjiknuri kishte kërkuar që të dërgoheshin, në Dibër në dispozicion të ish-drejtuesi policie në atë kohë, Arben Keshit, disa çuna problematikë, për t?u përdorur në rast nevoje.

Ndër të tjera përgjimet e publikuara nxorën në dritë dhe një bisedë të kryeministrit Edi Rama me Arben Keshin, funksionar i PS dhe më vonë drejtues i Policisë.

Në bisedën e përgjuar, Rama e pyeste Keshin nëse e kishte arritur objektivin, ndërsa Arben Keshi i përgjigjej se ?ishin në pritshmëri të mëdha?.

Në përgjime doli dhe ish deputeti tashmë kryebashkiaku i Lezhës, Pjerin Ndreu. Ish-deputeti socialist ishte përgjuar teksa urdhëronte që drejtorit të një shkolle t?i bëhej presion për të deklaruar votën për Partinë Socialiste ose të hënën ?të gjejë vrimë e të futet?.

Personi me të cilin komunikon Ndreu, sipas gazetës Bild, që publikon përgjimet, është Drin Gjeçi, drejtor i Arsimit në Dibër./CNA.al