Përplasja institucionale/ Zbulohet se si do të rrëzohen dekretet e Metës në shtator

10 Gusht 2019, 06:34, Politikë CNA

Javën e fundit, Presidenti Ilir Meta është angazhuar me kthimin e një sërë ligjeve ne Kuvend, me arsyetimin se cënojnë interesat e qytetarëve.

Konkretisht ai ka rikthyer për shqyrtim në Kuvend pesë ligje, si ndryshimet në Kodin Penal, ligjin për koncesionet dhe PPP-të, ligji për miratimin e kontratës për rrugën Milot-Balldren, ligjin për miratimin e kontratës për rrugën Orikum-Llogara dhe ligjin për Akademinë e Shkencave.

Por, sipas rregullave të reja që mazhoranca ka miratuar për shkurtimin e kohës dhe procedurave për shqyrtimin e dekreteve të Presidentit për rikthimin e ligjeve të miratuara në Kuvend, dekretet e kthyera mbrapsh pritet të rrëzohen.

Rregullat e reja

Në seancën e fundit të sesionit të kaluar, 19 korrik 2019, u miratuan me 106 vota pro ndryshimet në Rregulloren e Kuvendit.

Mes 75 neneve të ndryshuara u amendua edhe neni 86, për shqyrtimin e dekreteve të kreut të shtetit për kthimin e ligjeve.

Varianti i ri i miratuar parashikon që dekreti i Presidentit për rishqyrtim ligji futet automatikisht në programin e punës së Kuvendit dhe se komisioni përgjegjës përgatit raportin për seancën plenare me propozimin për pranimin ose rrëzimin e dekretit të Presidentit brenda 4 javëve nga data e depozitimit të tij në Kuvend, shkruan Shqiptarja.com

Ndërkaq, varianti i mëparshëm parashikonte që komisioni përgjegjës e shqyrton dekretin vetëm për çështjet e paraqitura nga Presidenti i Republikës dhe brenda 8 javëve nga data e fillimit të shqyrtimit paraqet raportin e tij.

Pra, ndryshimi i miratuar përgjysmon afatin brenda të cilit komisioni përgjegjës duhet të paraqesë në Kuvend raportin për miratimin apo rrëzimin e dekretit të kreut të shtetit.

Shkurtimi i procedurave

Ndryshimet në Rregulloren e Kuvendit shkurtojnë edhe procedurat për shqyrtimin e dekreteve të kreut të shtetit për kthimin e ligjeve.

Varianti i miratuar parashikon që komisioni përgjegjës e shqyrton dekretin vetëm për çështjet e paraqitura në arsyetimin për kthimin e ligjit nga Presidenti i Republikës.

Vetëm në rastin e pranimit të dekretit, raporti përmban formulimet për nene të veçanta të ligjit. Po ashtu, Kuvendi në seancë plenare voton me shumicën e kërkuar në Kushtetutë për pranimin ose rrëzimin e dekretit.

Ndërkaq, versioni i përparshëm parashikonte që raporti i komisionit përgjegjës përmban mendimin e komisionit dhe, sipas rastit, edhe propozime për nene të veçanta të ligjit.