E fundit!

13:58 Aktualitet

SPAK sekuestron pasurinë në pronësinë indirekte të Belinda Ballukut

Prokuroria e Posaçme ka vendosur masën e sekuestrimit pasu...

Ministrja gjermane e Mbrojtjes, emërohet presidente e KE

3 Korrik 2019, 11:55, Aktualitet CNA

Shtetet e BE kanë nominuar ministren gjermane të Mbrojtjes Ursula von der Leyen zyrtarisht si presidente e Komisionit Europian. Vendimi u mor në takimin e nivelit të lartë në Bruksel.

Ky propozim ka pasur mbështetjen e Francës dhe Spanjës. Edhe katër vende të Europës Lindore, Hungaria, Polonia, Çekia dhe Sllovakia e kanë mbështetur propozimin, siç bëri të ditur në një mesazh lëshuar në twitter, zëdhënësi i qeverisë hungareze.

Parlamenti duhet të japë votën

Megjithatë është ende e paqartë nëse von der Leyen do të marrë shumicën e nevojshme edhe në Parlamentin Europian. Zëvendëskryetari i fraksionit të socialdemokratëve Bernd Lange, bëri të ditur me twitter se propozimi i Tuskut nuk është i pranueshëm. Këtë e tha edhe politikani socialdemokrat gjerman Udo Bullman. “Një propozim i hidhur! Von der Leyen nuk është kandidatja më e mirë dhe në Gjermani kundër saj është duke u zhvilluar një hetim për dhënien jo sipas rregullave të kontratave për këshilltarët. Europa meriton diçka më të mirë!”, tha ai.

Merkelit iu desh të abstenonte

Kancelarja gjermane Angela Merkel abstenoi gjatë nominimit të von der Leyen, sepse koalicioni i madh në Berlin nuk arriti në marrëveshje. Kryesia e socialdemokratëve nuk e pranon nominimin e von der Leyenit. “Që me ministren gjermane të mbrojtjes të futet në linjë një politikane e “cila nuk ka hedhur kandidaturën, nuk është një gjë bindëse”, thanë kryetarët e Partisë Socialdemokratë, që e mbajnë këtë detyrë në mënyrë komisare, Malu Dreyer, Manuela Schwesig dhe Thorsten Schafer Gümbel. “Në këtë mënyrë bëhet absurde demokratizimi i Bashkimit Europian”.

Më parë ishte politikani i kristiansocialëve Manfred Weber ai që hoqi zyrtarisht dorë nga pretendimi për të marrë postin e Presidentit të Komisionit të BE. Zëdhënësi i tij i bëri të ditur agjencisë gjermane të lajmeve, dpa, se ai e dorëzoi mandatin si kandidat kryesor për Partinë Popullore Europiane.

Siç bëri të ditur presidenti i BE, Doland Tusk, kryeministri belg Charles Michel, do të marrë përsipër postin e përfaqësimit të vendeve anëtare të BE. Ministri i Jashtëm spanjoll, Josef Borrell, do të jetë i ngarkuari me politikën e jashtme të BE dhe francezja Christine Lagarde do të bëhet presidente e Bankës Qendrore Europiane (EZB). Ajo shkruajti në twitter se ndihet e nderuar nga emërimi dhe se do të dorëzojë postin e deritanishëm si drejtuese e Fondit Monetar Ndërkombëtar. Kandidati i socialdemokratëve Frans Timmermans, do të mbajë postin e zëvendëspresidentit të Komisionit të BE./ DW