Bashës i del situata nga kontrolli/ Pas kandidatëve, i "rrëshkasin" kryebashkiakët

22 Prill 2019, 09:19, Aktualitet CNA

Pas protestës së 16 shkurtit, opozita e bashkuar vendosi të djegë mandatet e deputetëve, në shenjë proteste kundër qeverisë, të cilën e akuzojnë se ka ardhur në pushtet me votat e blera me paratë e krimit.

Por, djegia e mandateve nga ana e deputetëve të opozitës, ka çuar në krijimin e një tjetër opozite parlamentare.

Katër deputetë të opozitës, përkatësisht Rudina Hajdari dhe Myslym Murrizi nga PD-ja, Lefter Koka nga LSI, dhe Robert Bitri si deputet i pavarur, nuk pranuan të djegin mandatet.

Ndërkohë, të tjerë kandidatë nga listat shumëemërore të PD-së dhe LSI-së, në zgjedhjet e qershorit 2017, kanë pranuar të marrin mandatet, duke e çuar në gati 25 deputetë numrin e deputetëve të opozitës në parlament.

Por, pasi kreu i Partisë Demokratike, Lulzim Basha pa që kandidatët e listave shumëemërore po pranojnë mandatet, vendosi të urdhërojë njërëz dhe mbështetës tij të pranojnë mandatet.

Pra, Basha në një farë mënyrë ka filluar të ?infiltrojë?, deputetë brenda opozitës parlamentare, të cilët mund të përdoren për të krijuar divension dhe përplasje brenda saj.

Por, nga ana tjetër duket se Lulzim Bashës po i dalin nga kontrolli edhe kryebashkiakët.

Lulzim Basha vijon të theksojë në qëndrimet e tij publike se nuk do të futet në zgjedhjet vendore, duke ripërsëritur kushtin e panegociueshëm, largimin e kryeministrit Rama dhe krijimin e një qeverie tranzitore, që sipas tij do përgatisë zgjedhje të lira.

Por, pas deputetëve, duket se edhe disa prej kryebashkiakëve në detyrë, nuk do t?i binden urdhërit të Lulzim Bashës për bojkot të zgjedhjeve.

Basha ditën e djeshme ka thirrur në një takim kryebashkiakët e PD-së, pasi mësohet se disa prej tyre kanë shprehur qëndrimin se mund të hyjnë në zgjedhje si kandidatë të pavarur apo të mbështetur nga parti të tjera.

Ndërkohë ka edhe një tjetër detaj. Pas deklaratave nga Rudina Hajdari, e cila e ka thënë në mënyrë të prerë që do të hyjë në zgjedhje, si dhe qëndrimet publike të Astrit Patozit, mësohet se edhe analistë pranë Lulzim Bashës, apelojnë që ky i fundit të mos bojkotojë zgjedhjet.

Nisur nga kjo situatë, duket se një pjesë e kryebashkiakëve në detyrë janë të gatshëm të garojnë në zgjedhjet lokalë edhe kundër vendimit të Bashës./ CNA.al

Zgjedhjet lokale/ Basha thërret në takim kryebashkiakët e PD-së

Ekskluzive/ Basha urdhëron futjen e kandidatëve në Parlament