Lanë mandatet, por jo pagat/ Ish-deputetët e PD dhe LSI, mashtrojnë hapur

1 Prill 2019, 15:55, Aktualitet CNA

Ka kaluar më shumë se një muaj kur Opozita e drejtuar nga Lulzim Basha vendosi të djegë mandatet, duke u larguar nga Parlamenti.

Me pretendimin se Shqipëria është në krizë ekonomike, se vendi është mbërthyer nga krimi, se institucionet janë të korruptuara e inkriminuara, Opozita, prej më shumë se një muaji ka dalë në rrugë, duke protestuar. Por, edhe pse lanë mandatet, trajtimi financiar dhe mjaft lukse të tjera për ish deputetët do të vijojnë, të paktën dhe 3 vite më pas.

Sekretari i përgjithshëm i Kuvendit, Genc Gjonçaj, me anë të një shkrese i ka njoftuar ish deputetët e PD dhe LSI -së, me përfitimet që iu njeh Ligji pas braktisjes së Kuvendit.

Këto përfitime, ndahen në dy paga shpërblim dhe gjysmë page çdo muaj për aq kohë sa kanë ushtruar mandatin e deputetit. Pra, 18 muaj paga, për ata që mandatin e kishin për herë të parë dhe deri ne 3 vjet për ata që kanë më shumë se 1 mandat deputeti.

“Bazuar në ligjin nr. 8097, datë 21.3.1996 “Për pensionet shtetërore suplementare të personave që kryejnë funksione kushtetuese dhe të punonjësve të shtetit”, i ndryshuar, ju jepet një shpërblim në masën e dy pagave mujore të muajit të fundit në atë funksion dhe mbas këtij shpërblimi marrin 50 për qind të pagës referuese, për aq kohë sa kanë punuar në funksione të tilla, por jo më shumë se 3 vjet nga momenti i largimit nga ky funksion. Për të përfituar shpërblimin prej dy pagash mujore, duhet të plotësoni një deklaratë me anë të së cilës deklaroni se nuk jeni të punësuar.

Për të përfituar pagën kalimtare (50% të pagës së deputetit), duhet të plotësoni librezën e punës pranë Sektorit të Trajtimit të Deputetëve “, thuhet në njoftimin e Sekretari të Përgjithshëm i Kuvendit, Genc Gjonçaj.

Kështu, ish-deputetët e PD dhe LSI-së, që iu “digjet” shpirti për qytetarët, dalin dhe vajtojnë në sheshe, por pa hequr dorë nga paga dhe lukset. Për më tepër, mirë që djegin mandatet, por do paguhen edhe dy opozita.

Ata që ishin dhe 22 deputetët e rinj që janë bërë pjesë e Legjislativit. Dy palë opozita do të paguhen me taksat e qytetarëve të varfër.

Thënë ndryshe rrjepen qytetarët për të siguruar mirëqënie politikanëve si atyre që punojnë apo si atyre që mashtrojnë./CNA.al