E fundit!

07:35 Politikë

Rama intervistë për CNN/ Përplaset me gazetaren për Zvërnecin: Duhet të më dëgjoni, sepse nuk ka projekt

Kryeministri Edi Rama ka dhënë një intervistë për CNN Inte...

KPK shkel afatin për Donika Prelën/ Nuk zbardh vendimin

25 Mars 2019, 10:24, Aktualitet CNA

Komisioni i Pavarur i Kualifikimit shkel afatet ligjore për zbardhjen e vendimit për drejtuesen e Prokurorisë së Krimeve të Rënda, Donika Prela.

Trupa gjykuese e drejtuar nga Roland Ilia, me relatore Valbona Sanxhaktarin dhe anëtar Olsi Komicin shpalli më 5 shkurt konfirmimin në detyrë të Prelës si dhe njoftoi se vendimi me shkrim do të komunikohej brenda 30 ditëve. Afati maksimal i zbardhjes, pa llogaritur ditën e njoftimit të vendimit është plotësuar të enjten më 21 mars, por KPK nuk e ka zbardhur ende atë në faqen e vet zyrtare.

Afati 30-ditor për Komisionin e Pavarur të Kualifikimit është detyrim ligjor, që buron nga pika 7 e nenit 55 të ligjit ?Për rivlerësimin kalimtar?. Donika Prela drejton Prokurorinë e Krimeve të Rënda prej majit të vitit 2018 si e komanduar nga Prokurorja e Përgjithshme e Përkohshme, Arta Marku. Prela është gjithashtu kandidate për Strukturën e Posaçme kundër Korrupsionit dhe Krimit të Organizuar, e njohur ndryshe si SPAK. Konfirmimi i Prelës kaloi përmes një sërë akuzash publike, kryesisht nga Partia Demokratike, e cila e akuzoi atë si të njëanshme.

Akuzat publike të deputetit të PD-së, Enkelejd Alibeaj, e detyruan KPK-në që ta shtynte njoftimin e vendimit nga data 29 janar më 5 shkurt. Prela po ashtu pati një seancë dëgjimore jo të lehtë. Ajo u përball me pikëpyetje mbi të ardhurat e bashkëshortit dhe transaksionet me pasuritë e paluajtshme në seancën dëgjimore me Komisionin e Pavarur të Kualifikimit më 22 janar. Prela u mbrojt, duke dorëzuar në Komision dokumente shtesë mbi të ardhurat familjare.

PROKURORJA

Drejtuesja e Prokurorisë së Krimeve të Rënda, Donika Prela, replikoi edhe me vëzhguesin e ONM-së, Theo Jacobs, i cili ngriti dyshime për mospagimin e taksave nga bashkëshorti për një pjesë të të ardhurave. Jacobs e krahasoi dosjen e saj të vetingut me shijen e keqe të një ilaçi të kapërdirë pa ujë në mëngjes, por që kalon në kohën e drekës.

Prokurorja Prela u përgjigj se ajo dhe bashkëshorti i saj kishin jetuar në Shqipëri dhe jo në ndonjë vend të BEsë, ku marrëdhëniet e punës fillojnë dhe mbarojnë në mënyrë të ligjshme. ?Bashkëshorti im ka nënshkruar një kontratë dhe i është përmbajtur detyrimeve të saj. Legjislacioni shqiptar ngarkon me përgjegjësi punëdhënësin për detyrimet dhe nuk ka asnjë dispozitë që tregon se tatimi në burim mund të paguhet në mënyrë vullnetare?, tha Prela.

Drejtuesja e Prokurorisë së Krimeve të Rënda u ngarkua me barrën e provës edhe për burimet financiare të një të afërmi të bashkëshortit, i cili u kishte dhënë 15 mijë euro hua për blerjen e një apartamenti në vitin 2007 si dhe dha sqarime mbi denoncimin e një qytetari lidhur me apartamentin ku banon aktualisht, i blerë për 110 mijë euro në vitin 2018.

Pas komandimit të saj në Prokurorinë e Krimeve të Rënda, Prela ka qenë disa herë në qendër të sulmeve kryesisht nga opozita që e akuzon për pengim apo mbyllje të hetimeve ndaj zyrtarëve dhe ish-zyrtarëve të lartë të shumicës qeverisëse.

Konfirmimi në detyrë vetëm mbi dy kritere, u shmang pasuria

Komisioni i Pavarur i Kualifikimit, më 5 shkurt të këtij viti dha vendimin përfundimtar për drejtuesen e Prokurorisë për Krime të Rënda, Donika Prela, duke e konfirmuar atë në detyrë. ?Pas një denoncimi publik, trupi gjykues ka njoftuar shtyrjen e seancës, duke konsideruar të nevojshëm verifikimin e këtij denoncimi nëse kishte elemente për rihapjen e hetimit. Verifikimet çuan në përfundimin se deri me tani nuk ka indicie të nevojshme për të çuar në rihapjen e hetimeve?, u tha ne nisje të seancës.

Më tej, u dha edhe vendimi: ?Trupi gjykues pasi shqyrtoi dokumentacionin, zhvilloi një procedurë të thellë hetimi për tri kritere, dëgjoi subjektin e rivlerësimit. Në përfundim, vendosëm konfirmimin në detyrë për Donika Prelën?. Një javë para se të konfirmohej në detyrë, Komisioni e shtyu dhënien e vendimit për Prelën, duke njoftuar se për ?shkaqe të arsyeshme?, vendimi do të jepej në një datë tjetër. Ndërkohë, pas seancës dëgjimore, opozita ngriti akuza në lidhje me hetimin e kryer ndaj drejtueses së Krimeve, duke thënë se, edhe pse janë konstatuar probleme me pasurinë dhe një pjesë e tyre nuk janë hetuar fare, Prela do të kalojë vetingun.

Referuar hetimit për Prelën, ka rezultuar se në dy kriteret e rivlerësimit, atë të pastërtisë së figurës dhe aftësive profesionale, prokurorja ishte e përshtatshme për të vazhduar detyrën. Problem, sipas relacionit të lexuar nga Pine, u bë paga e marrë në ?të zezë? e bashkëshortit të prokurores, dy apartamente të blera me një çmim më të ulët se vlera e tregut, si dhe një hua e marrë nga një i afërm./ Vladimir Karaj-BIRN