Dritëhijet e Vettingut/ Bujar Sheshi “dekonspiroi” procesin

2 Shkurt 2019, 10:07, Aktualitet CNA

Procesi i Vettingut i nisur që prej vitit të kaluar, pretendon të pastrojë sistemin e drejtësisë. Gjatë kësaj periudhe nuk kanë munguar zërat për dy standarte të aplikuara nga Komisioni i Vettingut.

Dhjetra vendime të KPK-së, janë ankimuar nga Komisioneri Publik, nga vetë subjektet, por pakënaqësi në disa raste ka shprehur edhe ONM.

Rasti i anëtarit të KLP ?së, Bujar Sheshi, hodhi dritë mbi prapaskenat e Vettingut.

Nëse për çdo subjekt që kalon Vettingun dhe më pas dalin në publik, materiale kompromentuese, që kanë kaluar në heshtje, do të thotë, se ky është një proces sa për sy dhe faqe. Thënë më qartë është një proces i pabesueshëm.

Bujar Sheshi, Prokurori i Apelit për Krimet e Rënda me 24.10.2018, u konfirmua në detyrë nga Komisioni i Pavarur i Kualifikimit. Ai kaloi procesin e Vettingut, pasi KPK, tha se nuk janë konstatuar probleme.

Sipas KPK, nga hetimet e bëra në vitin 2003, në lidhje me pasurinë ka rezultuar se prokurori nuk ka pasur detyrim ligjor të përshkruante në formular burimin e shpenzimeve të kryera.

ILDKPI kishte konstatuar vetëm një mosdeklarim të pasurisë në lidhje me një dhomë shtesë të ndërtuar në vitin 1998, e legalizuar në vitin 2015 dhe një autoveturë të blerë në vitin 2005.

Ndonëse burimi i parave për blerjen e makinës 7 mijë euro u konsiderua i paqartë, KPK konstatoi se prokurori ka pasur të ardhura të ligjshme për këtë veprim.

KPK shqyrtoi edhe raportin për aftësinë profesionale në të cilin thuhej se prokurori nuk ka pasur masa disiplinore dhe as denoncime ndaj tij, ndërsa ka aftësi në drejtim dhe trajtim të ligjit.

Kështu, gjithçka ishte në rregull dhe me 11 dhjetor 2018, Bujar Sheshi u zgjodh anëtar i Këshillit të Lartë të Prokurorisë.

Nuk kaloi shumë kohë, dhe në media u publikuan të dhëna të dokumentuara, se Sheshi ka qenë bashkëpunëtor i Sigurimit të Shtetit.

Një gjë të tillë e konfirmoi edhe Autoriteti i Dosjeve.

Sipas këtij Autoriteti ka fakte kontraktiktore për Bujar Sheshin, dhe ku në disa dokumenta rezulton se është ai është rekrutuar në moshë të mitur.

?Për rastin në fjalë, nga administrimi i dokumentacionit që disponojmë dhe nga verifikimet e kryera në fondet arkivore të cilat përmbajnë dokumente të ish-Sigurimit të Shtetit, të cilat ruhen në godina të ndryshme, shumë larg nga zyrat aktuale të AIDSSH, u ndeshëm me ekzistencën e dokumenteve kontradiktore për sa i takon të dhënave për shtetasin Bujar Sheshi, si dhe me faktin e njohjes me dokumentin e tërheqjes në bashkëpunim të shtetasit Bujar Sheshi në moshë të mitur (nën 18 vjeç). Në këtë kontekst, u zhvillua dhe procesi i riverifikimit, përmes Drejtorisë së Gjendjes Civile, të gjeneraliteteve të shtetasit Bujar Sheshi (kontradiktore me të dhënat e shënuara në Formularin e Aplikimit nga vetë z. Sheshi)?, thuhet në reagimin e Autoritetit të Dosjeve.

Por, Sheshi ka reaguar me padi ndaj Autoritetit të Dosjeve, pasi pretendon se nuk është ai personi në dosje.

Me datë 22.01.2019, Autoriteti i Dosjeve me anë të një letre i ka konfirmuar Prokurorit të Përgjithshëm se Sheshi ka qenë punonjës i Sigurimit të Shtetit. Ndërkohë, Prokuroria e Tiranës ka vendosur nisjen e një hetimi pas padisë së prokurorit Sheshi.

Situatën e bën të rëndë, fakti se kemi të bëjmë me një subjekt që ka kaluar Vettingun./CNA.al