E fundit!

08:34 Kronika

Operacion antidrogë në Malësinë e Krujës, Krujë dhe Thumanë

Autoritetet kanë kryer një operacion të gjerë antidrogë në...

"Cunam" kokaine në Gjermani/ Ja çfarë parashikojnë autoritetet vendase

28 Dhjetor 2018, 21:33, Aktualitet CNA

Në vitin 2018 autoritetet gjermane kanë konfiskuar më shumë kokainë se kurrë më parë. Hetuesit gjermanë parashikojnë luftë të ashpër mes rrjeteve kriminale, që kryesisht vijnë nga Ballkani Perëndimor dhe Maroku.

Porti spanjoll i Algeciras në prill 2018. Rregullisht autoritetet zbulojnë këtu pako me drogë, shumica e ardhur nga Amerika Jugore. Por ajo që hetuesit zbuluan një ditë mes bananeve ishte sulmi më i madh kundër trafikantëve të kokainës në Europë. Rreth 9 tonë drogë konfiskohen në kontenierë brenda një dite në prill, sasia më e madhe e kokainës që është siguruar nga autoritetet ndonjëherë në Europë, u shpreh ministri i Brendshëm i Spanjës. Vlera në treg gati një gjysmë miliardë euro.

Cunami i kokainës nuk ndërpritet

Kjo sasi rekord është treguese e një fenomeni, të cilin hetuesit gjermanë e policia e quajnë “cunami nga Amerika Jugore”. Sipas një vlerësimi të Zyrës Federale të Kriminalistikës në Gjermani, që zotëron transmetuesi publik, NDR në vitin 2018 është rritur sasia e konfiskuar e kokainës në Gjermani. 608 tonë u siguruan në Gjermani deri në nëntor të këtij viti.

Christian Hoppe drejton sektorin e luftës kundër drogës në Zyrën Federale të Kriminalistikës. Sipas tij arsyeja kryesore për këtë përmbytje me kokainë qëndron “në radhë të parë tek sasitë e mëdha të prodhuara në shtete si Kolumbia, Peruja dhe Bolivia”. Kokaina sot prodhohet në mënyrë eficiente, kështu nga një korrje kokaine përftohet më shumë kokainë se sa para disa vitesh.

Produkt i pastër dhe kriminalitet i lartë

Sipas një studimi të Qendrës Europiane për Drogën dhe Varësinë prej saj (EMCDDA), vazhdimësia e fluksit të madh të futjes së drogës ka bërë që të ruhet droga e pastër në shitjen nëpër rrugë me të njëjtin çmim. Sipas informacioneve të NDR-së, autoritetet madje janë të mendimit se çmimet për shitjen me shumicë të kokainës po bien. Por Allesandro Pirona nga EMCDDA paralajmëron se rritja e konkurrencës po e brutalizon gjithnjë e më shumë tregun e kokainës në Europë. “Ne shohim porositje vrasjesh, rrëmbime, dhunë kundër policëve dhe përpjekje për frikësim të punëtorëve të portit.”

Deri më tani në fokus të autoriteteve ishin Belgjika dhe Holanda. Me dy portet e tyre, Roterdami në Holandë dhe Anversi në Belgjikë, këto vende janë parë si portat kryesore të hyrjes së kokainës në europë. Eksperti i kriminalistikës, Christian Hoppe sheh rrezikun që rritja e konkurrencës mes rrjeteve të ndryshme kriminale të çojë edhe në rritjen e dhunës në Gjermani, për shembull përmes “eliminimit pa droje” të konkurrencës.

Rrjetet kryesore nga Ballkani Perëndimor dhe Maroku

Tregu i kokainës në Europë sundohet sot nga disa rrjete kriminale. Veçanërisht prezente, janë rrjetet kriminale nga Ballkani Perëndimor dhe Maroku, thonë autoritetet. Por edhe N’Drangheta nuk mbetet pas. Në një aksion të gjerë ndërkombëtar kundër mafias italiane në dhjetor 2018 u siguruan 4 tonë kokainë tek anëtarë që mendohet se janë pjesë e N’Dranghetas.

Sipas eskpertit Christian Hoppe, fitimet në miliarda në tregun e madh të drogës nuk përdoren thjesht për të financuar stilin luksoz të jetesës së disa bosëve të drogës. Tregtia me drogë shërben si “katalizator”, thotë Hoppe, për të kaluar në aktivitete të tjera kriminale si kontrabandën me njerëz, larjen e parave, vjedhjen. Nga ana tjetër fitimet ilegale depërtojnë gjithnjë e më shumë ne ekonominë legale duke e minuar këtë nga brenda.

Më shumë kokainë në kanalizime

Kokaina në Gjermani nuk është më një drogë që e përdorin ata që kanë para. Punonjësit socialë raportojnë për të prekur nga të gjitha shtresat e shoqërisë, studentë por edhe punëtorë në ndërtim, artistë por edhe bankierë. Prova të marra nga kanalet e ujërave të bardha e të zeza nga dhjetë metropole europiane, mes tyre, Barcelona, Parisi, Oslo, Anversi tregojnë një rritje masive të mbeturinave të kokainës. Sipas Allesandro Pironas një sinjal, se produktet e kokainës konsumohen sot nga gjithnjë e më shumë konsumatorë. Prandaj sipas tij rrjeteve kriminale iu duhen vënë përballë “rrjete të autoriteteve penale” që shkëmbejnë informacione në kohën e duhur për të marrë masat e duhura.