Heqja e certifikimit nga ambasada italiane/ Bushati: Bashkëpunim jetësor

19 Dhjetor 2018, 18:48, Aktualitet CNA

Ministri për Evropën dhe Punët e Jashtme, Ditmir Bushati ka zhvilluar një konferencë për shtyp së bashku me Ambasadorin e Italisë në Shqipëri, Alberto Cutillio, ku bënë publike dakordësinë e arritur mes ministrive të jashtme të dy vendeve mbi procedurën e heqjen e certifikimit të përkthimit nga ana e Ambasadës Italiane.

Bushati u shpreh se pas Austrisë dhe Belgjikës, Italia është vendi i tretë që heq certifikimin e përkthimit, por në këtë rast me një impakt disa fish më të madh, duke qenë se një numër i lartë qytetarësh shqiptarë jetojnë dhe punojnë në Itali.

?Procedura e heqjes së certifikimit nga ana e tyre, hyn në fuqi më 1 janar 2019 dhe përbën lehtësim për shtetasit tanë që konsiston si në shkurtim të afateve kohore, ashtu edhe të kostove financiare, duke marrë parasysh se ky proces, pra edhe certifikimi i përkthimit të dokumentit, tashmë do të përmbyllet pranë Sektorit të Legalizimit në MEPJ. Duke filluar nga 1 janar 2019, Sektori i Legalizimeve në Ministrinë për Evropën dhe Punët e Jashtme, në kuadër të këtij dakordësimi, do të legalizojë dokumentin origjinal si dhe përkthimin e tij?-tha ministri i Jashtëm.

Më tej ai theksoi se krahas këtij vendimi është bërë lehtësimi i një sërë shërbimesh konsullore me anë të mënyrës elektronike.

?krahas këtij hapi pozitiv në mënyrë të përshkallëzuar, siç kemi bërë për një numër të madh të shërbimeve konsullore që ofrohen sot për sot në mënyrë elektronike, falë bashkëpunimit me qeverinë italiane, në këtë moment ne vijmë me një paketë të re për 2019-ën, në kuadër të vëmendjes sonë të shtuar ndaj qytetarëve shqiptarë që jetojnë dhe kontribuojnë në Itali, por dhe si pjesë e reformës së shërbimit konsullor?.-deklaroi ai.

Kjo marrëveshje ka si qëllim që pas përkthimit të dokumentit certifikimi të merret përmes Ministrisë së jashtme dhe jo Ambasadës Italiane në Shqipëri.

Kjo proceduurë bën që afati i marrjes së shërbimit të shkurohet me katër ditë si dhe kursehen 2.830 lekë. Brenda vetëm një viti arrihet legalizimi i rreth 110.000 dokumente shqiptare për përdorim në Itali, që do të thotë se me procedurën e re, qytetarët shqiptarë do mund të kursejnë rreth 311.300.000 lekë./CNA.al