Ylli Manjani i përvishet LSI-së/ Nuk kursen as Metën

14 Dhjetor 2018, 09:10, Aktualitet CNA

Ish-ministri i Drejtësisë në qeverinë ?Rama 1?, Ylli Manjani, i cili vinte nga radhët e LSI, ka komentuar kthimin e buxhetit nga Presidenti Ilir Meta dhe pozicionimin e LSI-së në çështjen e studentëve.

Në një postim në rrjetet sociale Manjani shkruan se Presidenti bëri shumë mirë që e ktheu ligjin, por i kujton atij kohën kur bashkëqeveriste me Ramën.

Sipas Manjanit, nëse dje Meta, kryetar i LSI do kishte ndaluar votimin e ligjit për arsimin e lartë zgjidhja për studentët do ishte më e plotë.

?Ilir Meta, sot President i Republikës, bëri shumë mirë që e ktheu ligjin për Buxhetin e Shtetit.

Është padyshim një mundësi shumë e mirë për të reflektuar ndonjë zgjidhje nga ato që kërkojnë studentët.
Por, nëse Ilir Meta dje kryetar i LSI e bashkëkryetar i maxhorancës, do kishte ndaluar votimin e ligjit për Arsimin e Lartë, zgjidhja për studentët do ishte më e plotë.
Në fakt Ilir Meta nuk ndaloi dot asnjë ligj të mbrapshtë që miratoi dje maxhoranca PS-LSI. Nuk ndaloi as pisllëqet e kontrollit të drejtësisë nga Rama; as koncesionet; as taksat e larta; as emigracionin masiv; as anashkalimin e Presidentit të Republikës; as kanabisin e drogën.
Asgjë, megjithëse deputetë e ministra të LSI reagonin kundër këtyre gjërave. Pa llogaritur këtu persona të tjerë të njohur në publik e madje edhe Institucione ndërkombëtare si FMN.?-shkruan Manjani.

Më tej, ish-ministri thekson se edhe në rastin e LSI-së, sjellja politike e dëmton sot. Sipas tij, logjika është e thjeshtë: pse duhet t?u besojmë juve sot në opozitë, kur dje në pushtet nuk e ndaluat këtë harbut që sot qeveris?!

Manjani thotë se shpreson që ky pësim të jetë bërë mësim.

?Zaten kjo sjellje politike dëmton sot LSI. E bën atë të pabesueshme në publik. Logjika është e thjeshtë: pse duhet t?u besojmë juve sot në opozitë, kur dje në pushtet nuk e ndaluat këtë harbut që sot qeveris?!
Sigurisht që LSI do vijojë të jetë në politikë, por shpresoj që ky pësim të jetë bërë mësim. Politika nuk është as marrëveshje punësimi e as zgjidhje e halleve të ditës.
Politika duhet të shohë larg, ndryshe nuk është politikë.?-përfundon postimin e tij Ylli Manjani.