web counter
LEXO PA REKLAMA!

SHKARKO APP

App Store
Google Play

E fundit!

x

Sikur audio-përgjimi "Babale" të ishte i vërtetë!

9 Tetor 2018, 14:59, Aktualitet CNA

Prokuroria ka dalë me një përfundim, audio-përgjimi i servirur nga deputeti i Partisë Demokratike, Ervin Salianji i Albert Veliut, pra “Babales” me Agron Xhafajn është një montazh, që ka pasur edhe aktorë.

Nga ana tjetër deputeti Ervin Salianji i skuqur në studiot televizive kërkon të rrëzojë ekspertizën, duke thënë se është bërë ekspertizë e audios që është paraqitur në media. Në fakt Prokuroria ka bërë ekspertizën e audios që ka dorëzuar PD-ja. Megjithse pretendohet se nuk është origjinal audio-përgjimi i dorëzuar në Prokurori, pasi është me ndërhyrje. Nuk është origjinalja sepse audio-përgjimi që është dorëzuar është me titra dhe është audio-përgjimi që i është servirur mediave.

Por kjo pak rëndësi ka, rëndësi ka një tjetër detaj.

Le të marrim të mirëqenë faktin se audio-përgjimi është i vërtetë. Çfarë vlere ka ai sot dhe përse i duhej PD-së apo Lulizm Bashës në atë kohë?

Audio-përgjimi ka muaj e muaj që është bërë gati, por është ruajtur për shumë kohë nga Lulzim Basha dhe është hedhur gati në fillim të verës, ndoshta për të filluar pushimet e tij të qeta. Për të qenë më rehat gjatë sezonit veror. Për të pasur mundësi të flinte i qetë, të kalonte verë të qetë dhe të ndizte ndërkohë skenën politike.

Fillimisht pati një kauzë ishte kauza e vëllait të ministrit të Brendshëm, ajo që filloi të denoncohej nga deputeti i Partisë Demokratike, Enkelejd Alibeaj dhe këshilltari, Gazmend Bardhi. Pra deputeti Alibeaj dhe këshilltari Bardhi ngritën një kauzë shumë të fortë, atë të faktit se vëllai i ministrit Xhafaj ishte i dënuar për trafik ndërkombëtar droge dhe për më tepër prej 5 vitesh, edhe pse i kërkuar nga Interpoli lëvizte i lirë në Shqipëri.

Një fakt që drejtonte gishtin tek ministrit i ri i Brendshëm dhe një kauzë që minimalisht duhet të kishte çuar në dorëheqjen e Fatmir Xhafajt, i cili duhet të ishte larguar menjëherë sapo qenë verifikuar si të vërteta të gjitha akuzat e PD-së. Por kjo nuk ndodhi dhe gjatë rrugës shpërtheu skandali “Babale”. Pra nuk ka pse i duhet askujt për asnjë gjë skandali “Babale”. PD-së dhe politikës i mjaftonte qëndrimi dhe dokumentat e nxjerra nga Enkelejd Alibeaj e Gazmend Bardhi.

Ligjërisht dhe politikisht gjithçka mbyllej këtu. Duke qenë se nuk u zgjidh dot kjo, u gjet një nga këto lojra-luftat qesharake, një nga këto tollumbacet “Babale” që tashmë të kthehen në bumerang, që kanë një kosto politike të paimagjinueshme. Një veprim i tillë hedh në erë jo vetëm një kauzë si ajo e ngritur nga deputeti dhe këshilltari, por i jep kosto dhe për shumë e shumë kohë hedh në erë gjithçka ke ngritur politikisht mirë, apo keq në këto vite.

Dhe këtë e bëri Lulzim Basha me deputetin e tij Ervin Salianji me “Babalen”, prandaj tashmë nuk kanë më asnjë vlerë, edhe sikur audio-përgjimi të jetë i vërtetë nuk ka asnjë pikë vlere, kjo nuk i duhet më askujt.

Mjaftonte për të gjithë ajo çka ishte thënë për dënimin e vëllait të ministrit, inskenime dhe skenarë të ngritura me “Babale” dhe audio-përgjime tashmë nuk i beson më askush. Palët janë kthyer në të neveritëshme. Njëra akuzon, tjetra i përgjigjet me një kundër akuzë, njëra nxjerr një foto, tjetra nxjerr dy, njëra nxjerr një audio, tjetra nxjerr tre përgjime e kështu me radhë. Shqiptarët nuk besojnë më asnjë palë dhe prandaj “Babalet” dhe babalizmat e servirura nga Ervin Salianjet e Lulzim Bashës nuk i duhen askujt.

Mjaftonte kauza e ngritur, çështja që PD- po bënte publike, të cilës i hodhi një kovë me ujë dhe e fiku, duke përdorur audio-përgjime me montazhe si rasti i “Babales” që edhe në qofshin të vërteta, për shkak të atyre që i përmendëm më lartë nuk i interesojnë më askujt dhe nuk kanë asnjë pikë vlere. Mjaftonte kauza e parë ishte një njollë e zezë për qeverinë, por edhe atë njollë mesa duket Lulzim Basha, ia hoqi me dorën e tij dhe të deputetit të tij, Ervin Salianji./ CNA.al





Lajmet e fundit nga