E fundit!

12:23 Kosova & Bota

Europa në “valën e vdekjes”/ Temperaturat rekord shkaktojnë kaos dhe humbje jete

Një valë ekstreme e të nxehtit ka përfshirë Evropën, duke ...

Prapaskenat për postin e kryeprokurorit të Tiranës/ Marku u detyrua të firmosë?!

1 Gusht 2018, 15:59, Aktualitet CNA

Në krye të Prokurorisë së Tiranës, deri më tani kanë qenë emra që janë lakuar për afera të ndryshme.

Petrit Fusha, i cili i largua nga Prokurorja e Përgjithshme e përkohshme Arta Marku, dyshohet se favorizoi kryebashkiakun e Tiranës Erion Veliaj, duke mbyllur dosjen e Ardit Gjoklajt.

Së fundmi Dritan Rreshka rezultoi me pasuri të dyshimtë, gjë që i kushtoi profesionin e prokurorit.

Kujtojmë se Rreshka u përzgjodh nga vetë Arta Marku për të drejtuar Prokurorinë e Tiranës.

Por, sot, Prokurorja e përgjithshme e përkohshme ka habitur për disa arsye, me një vendim të marrë në lidhje me zëvendësimin e Rreshkës. Ajo ka komandur në krye të Prokurorisë së Tiranës, prokuroren e Krimeve të Rënda Elizabeta Imeraj.

Prapaskenat e vendimit të Arta Markut, për të vënë në krye të Prokurorisë Tiranës, Elizabeta Imerajn, duke ditur që kjo e fundit është edhe pjesë grupit hetimor të çështjes ?Tahiri?, po lakohen në tre pista.

E para, ka zëra se strategjia e Markut është që të shpërndaj prokurorët që janë pjesë e grupit hetimor të çështjes ?Tahiri?, për të zvarritur atë, edhe pse duke e ditur, se rasti tashmë ndodhet në Gjykatën e Lartë, e cila nuk funksionon.

E dyta, që ngre një tjetër pistë të dyshimtë të vendimit të sotëm të Arta Markut, ka lidhje me procesin e Vettingut.

Edhe pse prokurorja Elizabeta Imeraj nuk ka kaluar ende në procesin e Vettingut, Marku e vë në krye të Prokurorisë më të madhe në vend.

Ndoshta për Markun nuk përbën çudi Vettingu, se edhe u zgjodh në krye të Prokurorisë së Përgjithshme, pa e kaluar këtë proces.

E treta është se pas këtij vendimi dyshohet se fshihet edhe diçka tjetër. Duke qenë se Marku dështoi me prokurorin Rreshka, për të justifikuar hedhjen e firmës për komandimin e tij, zgjedh një emër që nuk kontestohet as nga opozita dhe as nga mazhoranca.

Elizabeta Imeraj, gëzon mbështetjen e opozitës por edhe të mazhorancës që zgjodhi Arta Markun.

Kujtojmë se ajo ka qenë kandidatja kryesore, për të qenë në vendin e Arta Markut. Por, kjo e fundit, sot ka zgjedhur që ?rivalen? e saj që gëzon mbështetje të pakontestueshme, ta vendosë në krye të Prokurorisë së Tiranës.

Edhe për Imeraj, vendimi i Markut duket se ka qenë i papritur. Ajo është njohur me vendimin ndërkohë që po pinte një kafe përballë Prokurorisë për Krime te Rënda.

Nga ana tjetër, nëse shikojmë këtë emërim, duket sikur kryeprokurorja Marku ka ndërruar këshilltarët, duke lënë kështu mënjanë shkeljet ligjore, që ka bërë me emërimet e tjera dhe në rastet kur drejtuesit e prokurorive nuk kanë qenë të komanduar.