Bisedime PD-PS për votimin e ligjit për gjyqtarët/ Zbardhen kushtet e opozitës

3 Korrik 2018, 08:02, Aktualitet CNA

Teksa fundi i këtij sesioni parlamentar po afrohet me shpejtësi, Partia Socialiste ka nisur lëvizjet dhe bisedimet për të mundësuar miratimin e disa ndryshimeve në ligjin për statusin e prokurorëve dhe gjyqtarëve, me qëllim për t?i hapur rrugën Shkollës së Magjistraturës për zëvendësimin në një kohë sa më të shpejtë të prokurorëve dhe gjyqtarëve që po largohen dhe do të largohen për shkak të veprimit të ligjit të Vetingut.

Ligji në fuqi parashikon që kuotat e pranimeve të kandidatëve për magjistratë përcaktohen nga Këshilli i Lartë i Drejtësisë dhe Këshilli i Lartë i Prokurorisë, por këto organe nuk janë ngritur ende për shkak se nuk ka përfunduar procesi i Vetingut për grupin e partë të prokurorëve dhe gjyqtarëve prioritar. Nga ana tjetër, me avancimin e procesit të Vetingut, po zgjerohet numri i vakancave në gjykata, çka e bën më urgjente ndërhyrjen e Parlamentit. Pas mbylljes së Gjykatës Kushtetuese, pritet boshatisja e gjykatave të apelit.

Që nisma e propozuar të miratohet duhen 84 vota, numër ky që imponon një konsensus politik apo sigurimin e të paktën 7 votave individuale. Në kushtet kur Lëvizja Socialiste për Integrim është shprehur e prerë kundër këtij projektligji, Partia Socialiste mësohet se ka hedhur sytë tek Partia Demokratike, duke parë mundësitë për arritjen e një kompromisi.-raporton shqiptarja.com.

Ndërkaq, burime pranë Partisë Demokratike thanë se partia më e madhe në opozitë është gati të votojë ligjin nëse shumica në pushtet pranon tre kushte. Kushti i parë parashikon rikthimin dhe votimin e një nisme të propozuar nga demokratët për ndryshimin e nenit të Kushtetutës për zgjedhjen e Prokurorit të Përgjithshëm. Nisma e PD parashikon shkarkimin e Arta Markut dhe miratimin e një kryeprokurori të ri me 3/5 e votave.

Nisma e PD është rrëzuar disa javë më parë nga PS, por megjithatë, opozita mund të gjejë një formë tjetër për të realizuar objektivin e saj politik, gjithnjë nëse do të ketë dakordësi nga shumica. Kushti i dytë i demokratëve parashikon largimin e ministrit të Brendshëm, Fatmir Xhafaj, ndërsa kushti i tre ka të bëjë me reformën zgjedhore, ku opozita kërkon aplikimin e numërimit dhe votimit elektronik.