Skandal-Vetting me vetdeklarim/ Gjyqtarët dhe prokurorët klientë të offshoreve?

14 Maj 2018, 09:39, Aktualitet CNA

Komisioni i Pavarur i kualifikimit u themelua me qëllim spastrimin e sistemit të drejtësisë.

Në kuadër të të ashtuquajturit Vetting, pritet përjashtimi nga sistemi i drejtësisë i një pjese të madhe të gjyqtarëve dhe të prokurorëve në vend.

Por, siç ka nisur Vetting-u, më shumë duket si një proces propagandistik politik se sa një proces i mirëfilltë për pastrimin e drejtësisë.

Vettingu po kryhet vetëm në bazë të vetdeklarimit të pasurisë nga gjyqtarët dhe prokurorët.

Askush prej tyre nuk do të deklaronte dhe në fakt nuk kanë deklaruar paratë e fshehura në offshore, udhëtimet luksoze, por janë mjaftuar tek-tuk me ndonjë hua që e arsyetojnë se ua kanë marrë familjarëve.

Ndaj, po kthehen në qesharake seancat dëgjimore të Komisionit të Pavarur të Kualifikimit, sa herë thërrasin para vetes gjyqtarë dhe prokurorë.

Si mund të bëhet Vetting duke iu referuar vetëm asaj që ata kanë deklaruar? Sigurisht, mosjustifikimi i një shifre të ulët nuk është se duhet të tolerohet.

Por, para pasurisë së fshehur jashtë vendit, apo të vendosur në pronësi të miqve e të shokëve brenda vendit, i bie që KPK të tallet me qytetarët.

Nuk është shkuar më tej për të verifikuar apo të hetuar se çfarë ka ndodhur me pasurinë e tyre prej miliarda euro apo dhe me bizneset e tyre. Si ka mundësi që nuk i kanë më brenda një kohe të shkurtër?

Në shtatorin e vitit të kaluar gjyqtarët dhe prokurorët, për t?i mbijetuar Vettingut për ligjshmërinë e pasurive, janë detyruar të shesin aksionet në shoqëritë fitimprurëse. I shitën apo thjesht ndërruan emrin e poseduesit dhe sërish i kanë vetë në pronësi?

Në media u raportua se bizneset ishin identifikuar nga ekspertët dhe ILDKPKI si një nga format më të përhapura dhe të aplikuara nga prokurorët dhe gjyqtarët për të pastruar, kamufluar dhe justifikuar paratë e korrupsionit.

Por çfarë po ndodh realisht?

Deri më tani janë shkarkuar tre anëtarë të Gjykatës Kushtetuese, një gjyqtar i Apelit të Durrësit dhe një prokurore, ndërkaq janë larguar nga sistemi i drejtësisë duke dhënë dorëheqje, 16 gjyqtarë e prokurorë.

Kujtojmë se anëtari i Gjykatës Kushtetuese, Fatmir Hoxha u shkarkua nga detyra, pasi ai nuk justifikoi 1.7 milionë lekë nga shuma totale e blerjes së një apartamenti në Tiranë.

Gjyqtarja Altin Xhoxhaj u shkarkua, pasi u tha se ka përfituar 100m² më shumë truall në Gjirin e Lalëzit dhe është e paqartë origjina e parave, me të cilat është blerë apartamenti. Gjithashtu për KPK, deklarimet e të ardhurave për vitin 2003 dhe 2004 kanë qenë të pasakta dhe mungojnë 4 milionë lekë

Fatos Lulo u shkarkua se nuk justifikonte një apartament në Kanada dhe 480 mijë dollarë.

Gjyqtari Besim Trezhnjeva u shkarkua pasi nuk justifikonte 20 milionë lekë pasuri.

Edhe prokurorja Besa Nikehasani, u shkarkua pasi nuk justifikonte të ardhurat e ligjshme për dy apartamente, dy garazhe dhe një makinë tip fuoristradë me vlerë rreth 20 mijë euro.

Këto pasuri të pajustifikuara janë vetëm ato që janë deklaruar, se me tjerat nuk është marrë askush./CNA.al