E fundit!

22:51 Aktualitet

Biznesmeni Artur Shehu thyen heshtjen: Jam pronar i vjetër i tokës në Zvërnec, nuk i njoh fare investitorët

Biznesmeni shqiptar Artur Shehu ka folur në emisionin Opin...

Si po humbet Berisha për shkak të mbështetjes ndaj Bashës

7 Prill 2018, 14:26, Aktualitet CNA

Lideri historik i Partisë Demokratike, Sali Berisha është njeriu që shihet si personi që mund të qetësojë gjakrat e prishur brenda PD-së dhe të bashkojë opozitën.

Kritikë dhe jo kritikë kanë bërë thirrje për rikthimin e tij, pasi Lulzim Basha e ka përçarë dhe po e dobëson çdo ditë e më shumë PD-në. Këtë e shpreh vetë Berisha, këtë e thonë shumica e demokratëve, por Lulzim Basha vazhdon të sillet si një infantil politik duke u qurravitur me ndjesa të panevojshme.

Në fakt me Lulin në krye të PD-së, dhe me refuzimin që po bën lideri historik i kësaj partie, po ndodhin edhe disa pasoja të tjera. Mbështetja që Berisha po i jep në hije Bashës dhe duke mos marrë përgjegjësi për ta larguar dhe bashkuar PD-në po i jep jo pak kosto ish-kryeministrit dhe ish-kreut të PD-së.

Ishte Berisha që e zgjodhi Lulzim Bashën në korrik të 2013-ës, ishte Berisha që e mbështeti Bashën në 22 korrik të 2017-ës dhe gjithmonë ka shërbyer si një valvul për të shfryer urrejtjen e demokrateve ndaj kreut aktual të PD-së. Sapo ngrihej uragani kundër Lulit, Berisha dilte dhe i qetësonte.

Ka një artikulim të kujdesshëm nga ana e Berishës për Bashën, qetësues dhe me mesazhe bashkuese, por në fakt nuk ka asnjë reagim as nga Basha, as nga kritikët dhe as nga baza.

Luli ndoshta është kryetari i vetëm i një partie që është në minorancë brenda partisë së tij. Atë nuk e do më askush, e mban deri diku mbështetja që i jep Berisha. Një akt që në fakt po i kushton jo pak liderit historik të PD-së, i cili duke heshtur përballë skandaleve të Lulzim Bashës dhe duke u sjellë në opinionin publik sikur nuk ka ndodhur asgjë, jo vetëm po i jep një shkelm rrënimit të PD, por Berisha pa asnjë diskutim po humbet mbështetjen brenda demokratëve, të cilët presin reagimin e tij të fortë.

Zgjidhje dhe reagim të arsyeshëm, bashkim të të gjitha vlerave dhe largimin e Lulzim Bashës, si shkaktari i katastrofës politike në PD, si njeriu që përtej një financimi të dyshimtë për lobim në SHBA, po akuzohet se ka cënuar edhe integritetin e NATO-s.

Luli nuk është viktima, Luli nuk ka gabuar. Luli është fajtori dhe përgjegjësi për gjithçka ka ndodhur dhe për këtë demokratët janë të bindur, pavarësisht se qëndrojnë të heshtur në mbrojtje të siglës së PD-së.

Berisha me sjelljen dhe artikulimin e tij politik dhe me sjelljen ndaj Lulzim Bashës po humbet atë besim që ka pasur si njeriu me parime që kurrë nuk do ta vinte në diskutim të vërtetën. Në këtë rast atë po e shohin të gjithë dhe sjellja e tij po i kthehet në një boomerang dhe në vend të ndihmës ndaj PD-së po rrënon dhe mbështetjen e tij nga demokratët./ CNA.al