web counter
LEXO PA REKLAMA!

SHKARKO APP

App Store
Google Play

E fundit!

x

Nga Artur Ajazi/ Policia e Elbasanit vazhdon të notojë në moçal

22 Janar 2018, 14:19, Aktualitet CNA

Zoti Ministër i Brendshëm

E dini se Policia e Elbasanit edhe pse ju u munduat të bëni ?rraprezalje? apo reformimin e strukturave të kalbëzuara, ka mbetur sërish në kufijtë e moçalit, ka mbetur sërish e pabesueshme në sytë e qytetareve dhe e zhytur në korrupsion.

E dini zoti Minister i Brendshëm se Policia e Elbasanit akoma mban akoma brenda saj elementë të korruptuar, të paaftë, dhe me CV  të ndotur nga shkelja e ligjit deri tek lidhja me rrjetet e inkriminuara.

Vallë kjo ishte ?reforma? që premtuat se do të zbatohej në Policinë e Elbasanit, vallë kjo ishte reforma që u zotuat të bënit në policinë më të përfolur të vendit, kur kanë ndodhur dhe po ndodhin  kaq shumë  ngjarje atje, kur furgonët e policisë merren me hallexhiun dhe më keq akoma me gazetarët, dhe nuk merren nga frika dhe lidhja korruptive, me të fortët ?

Zoti Ministër

Një fenomen i çuditshëm ka kohë që ndodh me policinë në pothuajse çdo qytet të vendit, edhe pse ju si kreu i Ministrisë Brëndshme, keni  deklaruar deklaroni dhe keni paralajmëruar se ?Vettingu do të përjashtojë nga rradhët e Policisë Shtetit çdo të paftë, çdo të inkriminuar dhe çdo punonjës policie të lidhur me rrjetet e trafikut apo dhe korrupsionit?.

Po ndalem në një prej policive tek ajo e  Elbasanit, e cila akoma edhe sot e kësaj dite,  mbetet ndër më të përfolura në shkallë vendi, mbetet ndër strukturat më të paafta, më të korruptuara dhe më të molepsura me rrjetet e trafikut dhe grupe rrugaçësh. Segmente të caktuara të strukturave të kësaj policie në shkallë  qarku, prej 5 vitesh rezultojnë të jenë implikuar në lloj-lloj aferash korruptive, në lidhje me rrjetet e trafikut të drogës dhe afera të tjera të pista.

Por më kryesorja  mbetet se atje mbijeton paaftësia. Edhe takimet tuaja me strukturat e Policisë Elbasanit, fillimisht u panë si  kthesë e fortë, dhe njerëzit atje besuan se ?ju do të ndryshoni gjithçka nga moçali atje?, por qenkan gabuar jo vetëm qytetarët por edhe unë si gazetar.

Kjo situatë e krijuar në 5 vitet e fundit, e ka njollosur qytetin e Elbasanit, qytetin e arsimit dhe shkencës, e kanë  kthyer qytetin e Elbasanit, në epiqendrën e ndodhive për shkak të paaftësive të policisë, qyteti ku mbushen faqet e gazetave dhe emisionet televizive, për faktin se kjo polici nuk ka qenë në gjendje të bëjë zap as krimin, as trafikun, as të godasë fenomenin negativ  të korrupsionit.

E vetmja ?punë? që bën Policia e Elbasanit  gjithë ditën hipur mbi makinat e shtetit duke harxhuar karburantin mbetet gjobitja e ndonjë hallexhiu duke mos harruar edhe gazetarët, pasi me ?të fortët? me rrugaçët dhe banditët ajo përshëndetet, puthet dhe bën edhe allishverishe, ashtu siç ka bërë gjithmonë. Pra vajtja juaj  e shpeshtë në Elbasan muajt e fundit, asgjë nuk ka ndryshuar. Këtë e them me kompetencë, sepse e kam provuar mbi ?xhepin? tim.

Në harkun kohor të tre muajve zoti Ministër, jam gjobitur pa asnjë shkak dhe arsye, në kundërshtim me ligjin tre here nga furgonët e Policisë Elbasanit, që prej kohësh nuk merren me aktet kriminale, por  gjuajnë makinat që nuk thyejnë ligjet dhe rregullat. Rasti më i fundit ishte pasditen e të djelës , kur nën shiun e furishëm kisha ndaluar për pak sekonda për të paguar një faturë në aksin rrugor nga Telekomi drejt Stadiumit.

Sapo jam futur  dhe kam kryer pagesën nuk u vonova më shumë se 50 sekonda, dhe kur dola pashë mbi xhamin e makinës gjobën 1 mije lekeshe të lagur nga shiu, që mbante firmën e njëfarë  Ilirjani, dhe makinën e policisë, që iku si hajdute me shpejtësi. Nuk më  erdhi keq për gjobën, por më tepër për skenën që pashë pak sekondra më vonë kur dy makina ?të fortësh? ndaluan , ulën xhamat e tyre , nisën të bisedonin qetë-qetë mes tyre, pavarsisht  rreshtit të gjatë të makinave që prisnin në trafik, sa të mbaronin muhabetin dy kokërruarit. Ja pra zoti Ministër , këto janë dy standardet e policisë që duam veçanarisht në  Elbasan ?

Zoti Ministër

Policia e Shtetit duhet të pastrohet nga dallkaukët, nga të korruptuarit, nga të inkriminuarit, dhe nga të paaftët, nga ata që e kanë njollosur atë, nga ata që kanë hyrë e dalë nga Policia e Shtetit 10 herë, duke dhënë e duke marrë milionat, dhe të vijnë në rradhët e tyre  djem dhe vajza të aftë, të pastër në moral dhe CV, për të qenë roje të ligjit dhe jo shkelësit e tij. e nise nga Elbasani zoti Minister, por duket se sërish nga Elbasanit duhet tja nisësh, sepse duket se atje ke akoma mbeturina të moçalit pa pastruar.





Lajmet e fundit nga