Pse Luli ndryshoi ditën e festës zyrtare të PD-së?

13 Dhjetor 2017, 12:11, Aktualitet CNA

Me 12 dhjetor të vitit 1990, u themelua Partia Demokratike e Shqipërisë, si e para parti opozitare dhe këtë dhjetor u festua 27-vjetori i themelimit të saj.

Por ajo që bie në sy këtë vit ishte fakti që Lulzim Basha e organizoi festën zyrtare të themelimit të PD-së, me datën 11 dhjetor, gjë të cilën e ka bërë disa herë edhe ish-kryeministri dhe ish-kryetari i PD, Sali Berisha.

Pra, 27-vjetori i themelimit të partisë më të madhe opozitare u zhvillua me datën 11 dhjetor, dhe jo me 12 dhjetor që është dita e themelimit zyrtar të saj.

Më poshtë ju sjellim një deklaratë për mediat, të vetë Partisë Demokratike, e publikuar me datën 13.12.2010, ku ndër të tjera shkruhet qartë se ?E para parti opozitare në vitin ?90-të, PD-ja u krijua në 12 dhjetorin e vitit 1990 pasi studentët morën nga ish diktatori i fundit komunist, Ramiz Alia, gjatë takimit të 11 dhjetorit, premtimin e pluralizmit?

Deklarata e plotë e PD, me datë 13.12.2010

Themelimi i Partise Demokratike te Shqiperise

Partia më e madhe e mazhorancës PD-ja shënoi dje 20 vjetorin e krijimit të saj. E para parti opozitare në vitin ?90-të, PD-ja u krijua në 12 dhjetorin e vitit 1990 pasi studentët morën nga ish diktatori i fundit komunist, Ramiz Alia, gjatë takimit të 11 dhjetorit, premtimin e pluralizmit. Studentë që prej ditësh ishin në protesta dhe pedagogët që iu bashkuan kësaj lëvizjeje në datën 12 dhjetor vendosën që emri i partisë të ishte Partia Demokratike dhe krijimi i saj u shpall në Qytetin Studenti në një miting që u mbajt po këtë ditë në orën 16.00. Në datat 14-15-16 dhjetor u hartua dhe u përfundua statuti dhe më datën 17, kur edhe doli dekreti për lejimin e partive të tjera politike u dorëzuan dokumentet pranë Ministrisë së Drejtësisë ku si anëtarë themelues të PD-së figuronin 285 firmëtarë. Legalizimi i Partisë Demokratike u bë 19 dhjetor një lajm që i gjeti themeluesit në Qytetin Studenti dhe që u festua me një miting në sheshin që sot mban emrin ?Demokracia?. Azem Hajdari është i pari drejtues i Partisë Demokratike pasi ai u vu në krye të komisionit nismëtar. Ndërkohë që në shkurt të vitit 1991 kryetari i partisë u zgjodh Sali Berisha njeriu i cili e drejton këtë forcë politike edhe sot.?/ CityNews