Hakmarrja e PS –së, kundër ish aleatit të saj LSI/ Furtuna në administratë zbret në shëndetësi

3 Dhjetor 2017, 12:23, Aktualitet CNA

Reforma në administratë ka zbritur në shëndetësi.

Pak kohë më parë kryeministri Edi Rama shkarkoi drejtorët e spitaleve, ndërkohë që radhën tani duket se e kanë punonjësit e tjerë të sektorit të shëndetësisë, teksa mësohet se reforma ka nisur në të gjitha qendrat shëndetësore, poliklinikat, spitalet dhe ambulancat.

Gjatë fushatës kreu i ekzekutivit paralajmëroi se të gjithë të emëruarit politik nuk do të gjejnë më vend në administratën e shtetit.

Madje, këtë shqetësim kryeministri Edi Rama ua ka shprehur kohët e fundit edhe ministrave, deputetëve dhe drejtorëve socialist, duke iu kërkuar që brenda muajit dhjetor të largojnë pjesën më të madhe të militantëve të Lëvizjes Socialiste për Integrim nga administrata shtetërore, e cila ka nisur.

Kështu, sipas burimeve të gazetës Sot, gjatë ditëve të fundit në të gjitha qendrat shëndetësore, ambulancat dhe poliklinikat kanë nisur inspektime për kontrollin e punës së mjekëve dhe infermierëve.

Madje mësohet se grupet e auditit po kalojnë në sitë të gjitha kartelat dhe dosjet e mjekëve dhe infermierëve, ndërsa në rast se konstatojnë shkelje, do ketë edhe shkarkime nga puna. Mirëpo, ky inspektim i nisur nga qeveria në gjithë institucionet e shëndetësisë lidhet edhe me një tjetër fakt.

Mësohet se në ditët në vijim, pritet që vala e shkarkimeve të nisë fuqishëm me punonjësit e administratës, kryesisht në nivel drejtorësh por edhe nëpunës të tjerë si mjek, infermier apo punonjës së informacionit, të cilët janë pjesë e poliklinikave dhe qendrave shëndetësore qofshin në Tiranë apo edhe në rrethe të ndryshme të vendit, ku padyshim më të ekspozuarit janë militantë e Lëvizjes Socialiste për Integrim.

Ministrat mobilizojnë bazën

Mirëpo, plani i kryeministrit Edi Rama për të shpartalluar Lëvizjen Socialiste për Integrim në të gjitha aspektet, duket se është kryefjala e ditës në radhët e socialistëve.

Kështu, burimet thanë se ditët e fundit, disa nga ministrat e kabinetit ?Rama 2? kanë nisur takime me bazën socialiste në qarqe të ndryshme të vendit, ku fokus i diskutimit ka qenë reforma në administratë, zgjedhjet e nisura për disa krerë të kësaj partie, si dhe organizmi sa i takon situatës së motit të keq që ka përfshirë vendin.

Mësohet se gjatë mbledhjeve ku kanë qenë të pranishëm ministrat, deputetët e zonave respektive, kryetarët e PS në rrethe si dhe drejtorë të rëndësishëm, fillimisht është diskutuar për rrugët që do të ndiqen për shkarkimin e militantëve të LSI-së nga administrata publike, pasi për këta të fundit po haset shumë vështirësi.

Madje, mësohet se ministrat dhe deputetët kanë qenë të prerë me vartësit e tyre, duke iu kërkuar që brenda këtij muaji të keni shkarkuar pjesën më të madhe të militantëve të Lëvizjes Socialiste për Integrim nga administrata shtetërore.

Ndërsa një tjetër pikë e diskutimit ka qenë, ecuria e zgjedhjeve për krerët e rinj të Partisë Socialiste, në ato zona ku kjo parti doli humbëse në zgjedhjet e 25 qershorit, krahasuar me zgjedhjet e vitit 2013. Dhe pikërisht për këto zgjedhje, ministrat kanë kërkuar që të përmbyllen brenda javës tjetër. Ndërkohë që një tjetër pikë që është diskutuar ka të bëjë me situatën e rënduar të motit që ka përfshirë vendin këtë javë.